Lo escritor, bloguer y locutor de radio Carlos García Esteban, estió este mierques en a Casa de Cultura d'Andorra pa presentar las suyas dos zagueras obras “Hechos de tinta” y “Penchada d'un filo”. Le acompanyó lo bibliotecario d'Andorra, José Ángel Aznar, y l'andorrana Tamara Marzo Rins, actual parella d'o escritor, estió la encargada de fer la presentación de l'autor y detallar lo suyo trayectoria.
"Hechos de tinta" ye la primera novela en castellán escrita per Carlos G. Esteban. Ha estau editada per Imperium edicions y publicada l'anyo pasau. En esta narración, Carlos detalla cinco protagonistas, dos escritors en busca de fama, una ex modelo que tamién escribe, un editor y una periodista. Los temas que se tractan en esta narración son la fama, l'ambición y los entresijos d'o propio mundo d'a literatura. En a sinopsis d'esta obra se define d'a siguient forma: "Una tinta que obliga a la chent a fer la voluntat de qui la usa. Cinco personaches d'o mundo literario que luitan per los suyos sueños, bien sían grans u humils. Un premio literario que torna d'o revés lo mundo d'os protagonistas y desencadena una serie d'escayecimientos imprevisibles". Seguntes declaraba l'autor, "esta novela charra sobre lo mundo literario, pero puede aplicar-se a qualsequier pasión que tiengamos, perque fabla d'a busqueda d'os sueños, d'a reconoixencia y la fama, amás tamién d'as conseqüencias que tiene tamién la exposición publica".
Amás d'este libro, Carlos G. Esteban, querió aprofitar pa presentar la suya primera novela, "Penchada d'un filo", que estió publicada en 2020 per Nogará, asociación cultural d'a quala García Esteban ye socio y con a quala colabora muito habitualment. En esta obra, escrita en aragonés, García Esteban charra d'a historia d'una treballadora que conta con un emplego precario y decide empecipiar a dar clases particulars d'aragonés. La historia se va embolicando y mantiene en vilo a lo lector dica lo final. La trama se desenvuelte en as carreras y puestos de Zaragoza.
L'autor reconoixeba que lo publico potencial d'as obras que ha escrito ye muito menor que lo d'as obras escritas en castellán y muito mas complicau aconseguir que se publique en aragonés, pero reconoixe que las y los lectors d'as obras en aragonés son muito fidels, ya que disposan de pocas obras publicadas en aragonés y apuntaba: "A las personas que nos fa goyo leyer en aragonés, leyemos tot lo que sale publicau en aragonés".
Anterior a estas obras l'autor ya publicó "Parola de follet" (2019), que replega relatos de fantesía y "Prou prou luen", quatro cuentos d'educación ambiental que publicó con Tamara Marzo Rins. Tamién ye autor de diversos relatos en aragonés. García Esteban escribe lo blog en aragonés Tierra de barrenaus, que ya conta mas de mil dentradas, y d'o programa de radio 'Tierra de barrenaus' que emite dende 2015 en a radio libre zaragozana Radio Topo, en directo los domingos de 21.00 a 23.00 horas.
En a suya presentación en Andorra, Carlos G. Esteban, querió lanzar la primicia que, en uns quince días, se lanzará la suya nueva obra, una publicación en aragonés que funcionará como una segunda parte de "Parola de follet" y en a quala l'autor decide tornar a lo chenero d'a fantesía lo qual "le encanta como autor y como escritor".
