"Penchada d'un filo", a primer novela en aragonés de Carlos G. Esteban

Lo segundo libro en solitario d'iste autor, blogger y locutor de radio, publicau por l'AC Nogara, se presento lo chueves 17 en lo Centro d'Historias de Zaragoza

Lo blogger y locutor de radio Carlos G. Esteban presienta iste chueves 17 d'aviento lo suyo segundo libro en solitario, publicau por l'Asociación Cultural Nogara.

"Penchada d'un filo" ye lo titol d'a suya primer novela, a on que una treballadora precaria empecipia a dar clases particulars d'aragonés y se va embolicando en una historia que te tien en candeletas dica la suya fin. Lo libro ye ambientau en Zaragoza, en los suyos bars y las suyas carreras. La protagonista ye una choven que fa parte d'o que se gosa clamar "precariau", habendo de fer quantos minijobs pa conseguir chuntar un chornal que le permita vivir.

Iste ye lo suyo segundo titol en solitario, dimpués de "Parola de follet", una replega de relatos de fantasía publicada en 2019 y de "Prou prou luen", quatre cuentos d'educación ambiental que publicó de cochunta con Tamara Marzo Rins. Antimás, ye l'autor dende 2006 d'o blog en aragonés Tierra de barrenaus, que ya cuenta mas de mil entradas, y d'o programa de radio 'Tierra de barrenaus radio' que emite dende 2015 y que en ista temporada blincará las cien emisions.

L'Asociación Cultural Nogara leva trenta anyos treballando por l'aragonés. Antimás de fer toda mena de cursos y actividatz ha refirmau arrienda prochectos culturals como libros, discos y revistas. En las suyas aulas, Carlos G. Esteban ha feito de mayestro d'a-saber-los cursos, amostrando aragonés a decenas d'alumnas y alumnos.

La presentación se fará en lo Centro d'Historias de Zaragoza a partir d'as 19.00 seguindo todas las midas contra la COVID, por lo que l'aforo será bien limitau. Dimpués, lo libro se podrá mercar en la siede de l'Asociación Cultural Nogara, en la Plaza Asso d'o barrio d'a Madalena (Zaragoza).

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de nuestra política de cookies, pincha el enlace para más información.

ACEPTAR
Aviso de cookies