Fita historica: l’Academia Aragonesa de la Lengua apreba la ortografía de l’aragonés

Una excelent noticia aguardada dende fa muitos anyos per la comunidat lingüistica de parladors d’aragonés, que permite establir las bases pa seguir abanzando en o proceso de codificación d'a luenga aragonesa, y favoreixerá una mayor presencia de l'aragonés en toz es ambitos d'a sociedat.

Fita historica: l’Academia Aragonesa de la Lengua apreba la ortografía de l’aragonés
Foto: Qinghill en unsplash

Lo Pleno de l'Academia Aragonesa de la Lengua, en sesión extraordinaria celebrada lo pasau luns 3 d'abril, ha aprebau la Ortografía de l’aragonés, la normativa ortografica oficial de l'aragonés.

Con esta historica decisión, l'Academia mete fin a la situación actual de concurrencia de multiples propuestas ortograficas pa la escritura de l'aragonés. La propia AAL reconoixió esta situación de partida en octubre pasau, cuan aprebó un acuerdo normativo que, provisionalment, consideraba “uso correcto” l’uso de cualsequiera d'as normas graficas preexistents, dica que se publicase la normativa ortografica en que la Institución yera treballando. Dende l'aprebación, este pasau luns, d'a normativa ortografica oficial, queda sin efecto l'acuerdo publicau en o mes d'octubre.

La Ortografía de l’aragonés ha estau elaborada per la Comisión de Grafía de l'Instituto de l’Aragonés. Esta comisión, constituyida con ixa finalidat l'11 d'abril de 2022, ha estau presidida per Ánchel Conte y en fan part toz los miembros de numero de l'Instituto. A lo largo de 23 sesions de treballo d’a dita comisión y de dos reunions d'o Plenario de l'Instituto, los academicos y academicas van acordar los diferents puntos que conforman esta norma ortografica. Pa ixo, la Comisión va partir d'as solucions aportadas per las distintas normas y tradicions graficas existents dica hue, asinas como d'as propuestas presentadas per los propios academicos y academicas.

Con l'aprebación d'esta normativa ortografica, l'Academia Aragonesa de la Lengua ha alcanzau una fita historica, aguardada muitos anyos per la comunidat lingüistica. La existencia d'una normativa ortografica oficial permite establir las bases pa seguir abanzando en o proceso de codificación d'a luenga aragonesa, y favoreixerá una mayor presencia de l'aragonés en toz es ambitos d'a sociedat.

L'acuerdo normativo puede trobar-se en este vinclo. Y tamién puede descargar-se lo texto d'a ortografía de l'aragonés, tanto en aragonés como en castellano.

Lo tant asperau como necesario alcuerdo, ubre una nueva esperanza pa un d'os idiomas europeus en mayor riesgo de desaparición. La publicación d'a Ortografía Oficial de l'Aragonés desfa lo bloqueyo que entre decenios s'heba produciu entre los diferents sectors d'as entidatz en defensa d'esta luenga. Agora, cal que totas ixas entidatz, personas a titol individual y administracions publicas faigan honra d'o marabilloso treballo realizau per l’Academia Aragonesa d'a Luenga.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de nuestra política de cookies, pincha el enlace para más información.

ACEPTAR
Aviso de cookies