Lo Pleno de l'Academia Aragonesa d'a Luenga, en a suya sesión celebrada lo pasau chueves 6 d'octubre, aprebó per unanimidat lo suyo primer alcuerdo normativo, relativo a la normativa ortografica d'uso oficial de l'aragonés. La disposición considera uso correcto d'a luenga la utilización de qualsequiera d'as normas graficas existents, dica que l'Academia publique nuevas directrices en materia ortografica.
Lo texto ha estau publicau hue en o Boletín Oficial d'Aragón
Con este alcuerdo, adoptau a propuesta de l'Instituto de l'Aragonés, l'Academia tracta d'aclarir la situación normativa de l'aragonés en o momento actual y ofrir seguranza a la ciudadanía que quiere escribir en aragonés y tiene dubdas a la hora de optar per qualsequiera d'os modelos ortograficos existents, asinas como para qui participen en convocatorias de subvencions, premios literarios u artisticos, prebas de certificación, etc., en que los suyos criterios d'admisión u valoración se fa referencia a l'Academia u se menciona la normativa lingüistica d'a luenga aragonesa.
L'Academia, que ye treballando actualment en a elaboración d'a normativa grafica oficial de l'aragonés, ha quiesto asinas tresladar a la sociedat lo modo de funcionamiento interno d'a institución, pues, como diz lo texto aprebau, la voluntat d'os suyos miembros ha estau considerar, provisionalment, totas las normas lingüisticas preexistents como validas pa la escritura de l'aragonés, respectando y reconoixendo asinas la important labor previa d'investigación y codificación realizada per asociacions y institucions.
