Dimpués de tres anyos d'investigacions periodisticas per parte de l'equipo d'a Directa, las infiltracions policials en os movimientos socials llegan a la televisión publica de Catalunya lo domingo 12 de chinero per la nueit. Infiltrats ye una producción de 3Cat con a colaboración d'a Directa y de Polar Star Films.
Con una hora de duración, lo reportache audiovisual amuestra detalles d'o modus operandi y los patrones comuns d'os policías, a la vegada que ubre lo debat sobre os limites d'este tipo d'operacions. Amás, per primera vegada, se dan a conoixer cualques d'as errors que los policías infiltraus cometioron y que estioron claus pa descubrir-los.
Realizau los zaguers meses, lo reportache d'o “30 minuts” incluye una veintena d'entrevistas a activistas, testigos, avogaus, psiquiatras, expertas y policías. Pa fer-lo, l'equipo, endrezau per Gemma Garcia Fàbrega y Sònia Calvó Carrió, s'ha desplazau per los Països Catalans (Barcelona, Girona, Tarragona, València, Mallorca i Menorca) y Madrit. Tamién s'ha contau con a colaboración d'a productora audiovisual Polar Star Films. Per primera vegada, charran dreitament cuantas personas afectadas de toz los casos d'infiltración descubiertos dica agora en os Països Catalans.
Cuatro ‘topos’ en os movimientos socials
Lo reportache explica como, a primers de 2020, poco dimpués d'as mobilizacions de l'agüerro de 2019 contra la sentencia d'o Procés, a lo menos cuatro achents d'o Cuerpo Nacional de Policía (CNP) se infiltran en os movimientos socials d'os Països Catalans. Baixo identidaz falsas, María Perelló aterriza en Girona, Ramón Martínez, en València, y Daniel Hernàndez y Marc Hernàndez, en Barcelona.
Los cuatro forman parte d'a 33ª promoción d'a Escuela de Policía d’Àvila y actúan baixo as órdens d'a Comisaría Cheneral d'Información, lo servicio ‘d'intelichencia’ d'o Cuerpo Nacional de Policía. Las suyas funcions son “la captación, la recepción y lo tractamiento d'información pa l'orden y la seguranza publica”. Las instalacions se troban en un gran complexo policial en o vico madrilenyo de Canillas. Totas las actuacions s'executan baixo la mordaza d'a Lei de Secretos Oficials.
En o marco d'as operacions, los infiltraus se matriculan en a universidat y ocupan plazas publicas, lideran accions de sabotache, asisten a una reunión con avogaus pa definir la estratechia de defensa d'un activista y mantienen relacions sexoafectivas.
Marc aconsigue vincular-se a la ezquierda independentista a traviés d'a universidat y tamién gracias a l’aval d'a suya participación en un colectivo per lo dreito a la vivienda d'o vico Gòtic de Barcelona. En Valencia, Ramón lidera accions de sabotache, un rol que pa l'avogada d'Alerta Solidaria Maria Josep Martínez ye una forma de lechitimarse y no devantar garra tipo de sospeita.
Dani encadena y superpone relacions con mullers de diferents prochectos politicos de Barcelona como “metodo” d'infiltración, seguntes l'avogada Laia Serra. María estableix una larga relación con o militante chironés Òscar Campos, pa qui pasa a estar “un puntal incondicional”.
De feito, l'achent d'o Cuerpo Nacional d'a Policía espanyola María I. T. estió la cuarta espía descubierta d'a promoción d'o 2019 y un d'os casos que tenió mas eco mediatico. Òscar Campos visitó la casa familiar de María en o vico d’Establiments de Palma, an mai y filla mintioron sobre l'actividat laboral d'a policía infiltrada.
La mai establió una relación telefonica estreita con o espiau y lo suyo entorno en Girona, con quí compartió momentos intimos. De feito, María estió la unica que presentó a la suya familia real y agora encara se desconoixe per qué lo fació: si estió una iniciativa propia u seguiba órdens d'os suyos superiors policials.
Lo reportache tamién fa referencia a los casos d'infiltración policial que i hai habiu en Madrit y lo caso britanico, conoixiu con o nombre de “Spycops Scandal”. Mas d'un centenar de policías espioron a mas d'un milar de grupos politicos d’ezquierda, mantenioron relacions sexoafectivas y, mesmo, en bel caso, plegoron a tener fillos.
Tortura y maltrato
“Lo momento de descubrir que Marco yera un infiltrado estió muito duro y muito fuerte, de pensar que tot lo que hébanos iu teixindo aquels dos anyos se trencaba y tamién sentimos espanto y rabia de no entender per qué nos heban feito esto a nusatros”. Asinas relata Guillem Ortega, activista y militante d'o Sindicato d'Estudiants d'os Països Catalans (SEPC), lo que comportó descubrir que lo ‘companyero de clase’ que conoixeban no existiba y yera un policía infiltrado.
De feito, pa lo psiquiatra y director d'o Centre Sira, Pau Pérez-Sales, se trata de situacions de maltrato u de tortura: “Ha d'haber un sufrimiento grieu, una intencionalidat, un proposito d'obtener información, de castigar, de rebaixar u de discriminar, y l'ha de fer un funcionario d'o Estau”. Seguntes Pérez-Sales, los cuatro supuestos se dan en os casos d'infiltracions obchecto d'o reportache.
A resultas d'os casos d'infiltración policial descubiertos, personas y colectivos afectaus han presentau cuantas querellas. Totas ellas coinciden en acusar a los achents y los suyos mandos d'un delito de tortura y maltrato, y revelación de secretos, entre atros.
La valor d'o periodismo d'investigación
Lo reportache ye lo resultau final d'anyos d'investigacions periodisticas. De feito, la Directa descubrió los cuatro casos gracias a lo treballo d'un equipo d'investigación formau per Gemma Garcia Fàbrega, Jesús Rodríguez Sellés, Ester Fayos, Irene Molina, David Bou i Marc Iglesias Colomer. Ye lo treballo persistent, minucioso y a largo plazo d'este equipo lo que ha feito posible lo reportache d'o “30 minuts” de 3Cat Infiltrats, que s'enguera lo proximo domingo 12 de chinero.
Amás, la investigación, conoixida con o nombre de Espionaje d'Estau, ganó lo 9º premio de periodismo d'investigación Ramon Barnils en noviembre de 2023. Lo churau valoró especialment lo rigor, as tecnicas d'investigación y lo impacto social d'as informacions, amás d'o impacto politico y social d'a investigación.
En muitos momentos, la investigación no habría estau posible sin la confianza y la colaboración de colectivos, organizacions y personas afectadas, asinas como avogadas y atras personas anonimas que, con absoluta discrección, dioron un truco de man cuan estió necesario.
Gracias a esto, en chunyo d'o 2022, salió a la luz lo primer caso d'infiltracions policials que destapaba la Directa. Lo policía I. J. Y. G., de 29 anyos, baixo la identidat falsa Marc Hernàndez Pons, se infiltró en a ezquierda independentista y en o movimiento per lo dreito a la vivienda. A resultas d'este caso, per primera vegada lo Ministerio de l'Interior reconoixió y chustificó las operacions d'infiltración policial en os movimientos socials.
