Promoviu por Europa Laica demandando “o fin d’os privilechios d’a Ilesia”, o manifiesto ya ha estau suscrito por personalidatz como “Javier Sádaba, Nieves Concostrina, Benito Zambrano, Nazanin Armanian, Leo Bassi, Javier Pérez Royo, Juan José Tamayo, Rosa Cañadell u Javier Ruibal”, destacan dende a entidat, asinas como una larga lista d’escritoras, academicos, artistas y activistas a titulo individual, y colectivos socials y entidatz de diversa mena.
A lo centenar y meyo de personalidatz d’a sociedat civil se suma “una larga lista de colectivos comprometius con o laicismo y a neutralidat de l’Estau espanyol en materia relixiosa, como Derecho a Morir Dignamente (DMD), Plataforma Recuperando, Fundació Ferrer i Guàrdia, Red de Asociaciones de Ateos, Redes Cristianas, Asociación Internacional de Libre Pensamiento (AILP) u la Red Laicista Europea”. Totz els exichen en o manifiesto “a derogación d’os acuerdos entre l’Estau espanyol y a Santa Seo”.
O manifiesto lamenta que un “gobierno progresista no haya ubierto a puerta a reformas profundas y mantienga en pleno sieglo XXI un tractato que consagra privilechios ta o catolicismo y erosiona a libertat de conciencia d’a ciudadanía”.
Istos acuerdos, suscritos en 1976 y 1979, y consideraus por Europa Laica como “una prolongación d’o Concordato franquista de 1953”, son calificaus en o manifiesto como “incompatibles con un Estau verdaderament aconfesional y democratico”. A entidat laicista denuncia que ditos pactos “mantienen privilechios inxustificaus y perpetúan una relación institucional que vulnera o principio de separación entre Ilesia y Estau”.
Por tot isto, a organización ha iniciau una campaña de recullida de firmas dirichida a la ciudadanía, con l’obchectivo de “recabar un amplo respaldo social a ista reivindicación”. A campaña fixa una primera meta de entrega de firmas en o Congreso d’os Diputaus y Diputadas “ta la fecha en a que ye prevista una intervención d’o Papa León XIV davant de congresistas y senadors, una presencia de caracter institucional en a seu d’a soberanía espanyola que suposa una inadmisible deriva confesional, que Europa Laica ya ha denunciau”.
Pa rematar, finalment Europa Laica fa un clamamiento a la participación ciudadana y a l’emparo “de totas aquelas personas y entidatz que esfenden un modelo d’Estau laico, basau en a igualdat, a neutralidat institucional y o respecto a la diversidat de conviccions”.
Manifiesto “Por a derogación d’os acuerdos con a Santa Seo: ta un Estau laico”
Creyemos que un gobierno de vocación progresista ubriría a puerta a reformas profundas. Manimenos, entre apoyos fragils y o resurxir de viellos reaccionarismos, istas transformacions no han arribau u han quedau a meyo camín.
O tiempo d’as escusas ha rematau. O que queda de lechislatura ha d’estar tiempo de valentía.
En pleno sieglo XXI, Espanya mantiene un Concordato con a Santa Seo baixo a denominación d’Acuerdos de 1976 y 1979. Un tractato que consagra privilechios ta o catolicismo y erosiona a libertat de conciencia d’a ciudadanía. Que os fondos publicos sigan financiando a o clero ye un anacronismo. Que milers de millons d’euros sostengan colechios catolicos y l’adoctrinamiento relixioso en as aulas ye una anomalía democratica. Que as nuestras leis educativas, fiscals y tributarias sigan condicionadas por acuerdos internacionals con o Vaticano ye una distorsión d’a soberanía popular.
Os concordatos no son instrumentos neutros. Han estau, historicament, ferramientas de blindache institucional en rechimens autoritarios como os de Hitler, Mussolini, Franco u Salazar. No ye casualidat.
Os grupos parlamentarios que sostienen a o Gobierno han defendiu en os suyos programas a necesidat de derogar istos acuerdos. Tamién o Parlamento lo ha reclamau en lechislaturas anteriors.
No se puede charrar d’una verdadera reforma educativa mientres iste Concordato siga vichent.
No se puede garantizar plenament a libertat de conciencia mientres existan privilechios churidicament blindaus.
No se puede construyir un Estau verdaderament democratico con una excepción confesional incrustada en a suya arquitectura legal.
Os Acuerdos de 1976 y 1979 son a zaguera trinchera churidica d’os privilechios eclesiasticos. Y tota trinchera puede estar estricallada.
Por tot isto, as asociacions y personas firmants exichimos a lo Gobierno de l’Estau espanyol que cumpla os suyos compromisos electorals y inicie de contino os tramites ta la denuncia y derogación d’os Acuerdos con a Santa Seo.
O Reino d’Espanya debe dar un paso enta debant. Debe zarrar definitivament una herencia d’o franquismo que ya no representa a una sociedat plural, diversa y madura. No pedimos privilechios ta dengún. Pedimos igualdat. Pedimos neutralidat institucional. Pedimos libertat de conciencia real ta totas as personas, crean o que crean u deixen de creyer.
A oportunidat existe. A responsabilidat tamién. Ya no i hai escusas.
