Escocia, Gales y o norte d’Irlanda han feito en Cardiff un paso conchunto en esfensa d’o dreito d’os suyos pueblos a decidir o suyo futuro. Os responsables d’o Partiu Nacional Escocés (SNP), Plaid Cymru y Sinn Féin han sinyau una declaración que refirma a cooperación entre as tres fuerzas soberanistas y reclama a lo Gubierno britanico que no bloqueye os procesos d’autodeterminación.
O documento leva as sinyaduras de John Swinney, responsable d’o SNP y primer ministro escocés; Rhun ap Iorwerth, responsable de Plaid Cymru y primer ministro galés; Michelle O’Neill, vicepresidenta de Sinn Féin y ministra prencipal d’o norte d’Irlanda; y Mary Lou McDonald, presidenta de Sinn Féin.
A imachen politica ye inedita. “Por primer vegada en a historia”, destaca a declaración, Escocia, Gales y o norte d’Irlanda tienen de conchunta primers ministros compromesos con a independencia. “O panorama politico ye cambiando”, sostienen as quatre personas sinyaderas.
“Un momento historico”
Michelle O’Neill ha definiu a trobada como “un momento historico” y una muestra d’o “enorme cambio” que viven Irlanda, Escocia y Gales. “O cambio ye plegando y continará plegando”, ha afirmau a responsable de Sinn Féin, que mete o suyo horizonte en “un futuro millor en una Irlanda nueva y unida”.
Mary Lou McDonald ha metiu l’accento en as posibilidatz que ubre iste escenario: “O dreito a decidir o nuestro propio futuro ye un prochecto ilusionant, pleno d’esperanza, ambición y oportunidatz”. Ta la presidenta de Sinn Féin, a trobada suposa “un momento historico” en que as tres fuerzas s’achuntan ta esfender “os intereses d’as nuestras nacions y o suyo dreito a la independencia”.
“Por primer vegada en a historia, tres primers ministros nacionalistas y partidarios d’a independencia ocupan o cargo”, ha destacau McDonald. A lo suyo entender, ye “una muestra poderosa d’o enorme cambio d’os tiempos que vivimos”.
Cada nación, a la suya manera y en o suyo tiempo
L’acuerdo no fixa un camín unico enta la independencia. As tres fuerzas reconoixen que parten de situacions constitucionals diferents y sinyalan expresament que “cada nación determinará o suyo propio futuro, a la suya manera y en o suyo tiempo”.
O prencipio compartiu, manimenos, ye bien claro: “Garra Gubierno de Westminster no tiene dreito a blocar a democracia ni a minar o prencipio que os nuestros pueblos decidirán o suyo propio futuro”.
Swinney lo ha dito encara mas claro dimpués d’a trobada: “Si ista contina estando una unión voluntaria, Westminster no tiene garra dreito democratico a negar-nos o nuestro dreito a trigar”. O primer ministro escocés sostién que “o tiempo de Westminster ye plegando a la suya fin” y reivindica que o futuro d’Escocia, Gales y Irlanda ha d’estar “en mans d’os nuestros pueblos”.
“Creyemos que bi ha un camín millor”, adhibe o responsable d’o SNP: unas nacions que treballen “chuntas como iguals”, compartindo conoixencias y construyindo relacions basadas “en o respecto mutuo y os intereses comuns”.
O periodista Ibai Azparren destaca en GARA que a cita de Cardiff se produce en un escenario politico sin precedents, con as tres nacions gubernadas a lo mesmo tiempo por fuerzas soberanistas y con procesos nacionals que, encara que se troban en momentos diferents, comparten agora una voluntat clara de cooperación.
“As nuestras nacions tienen dreito a decidir o suyo propio futuro”
Rhun ap Iorwerth ha insistiu precisament en ixa cooperación: “As nuestras nacions tienen dreito a decidir o suyo propio futuro”. Ta lo responsable de Plaid Cymru, as tres fuerzas tienen “muito que ganar treballando chuntas, como socias y como iguals”, especialment allí an comparten intereses y a colaboración pueda amillorar as condicions de vida d’as poblacions que representan.
A declaración concreta ixa cooperación en diferents ambitos: una economía “mas fuerte y chusta”, un mayor control sobre os suyos propios recursos enercheticos, o refirme d’as relacions internacionals y europeas y a esfensa d’o dreito a l’autodeterminación.
Europa ocupa, de feito, un puesto destacau. Os tres partius consideran que o Brexit ha feito mal a las suyas economías y ha reduciu as oportunidatz d’as suyas poblacions. “Creyemos que o futuro d’as nuestras nacions perteneixe a la Unión Europea”, replega o documento, que planteya reconstruir y refirmar as relacions europeas en ambitos como o comercio, a inversión, a cultura y a cooperación.
O memorando remata con una demanda dreita a lo Gubierno britanico: “preparar, planificar y facilitar o cambio constitucional en cada churisdicción”.
Sin calendarios compartius y con camins diferents enta la soberanía, SNP, Plaid Cymru y Sinn Féin deixan en Cardiff un mensache politico común: o futuro d’Escocia, Gales y Irlanda ha de decidir-se en Escocia, Gales y Irlanda, no en Westminster.
