Lo dreito a vivir en a luenga propia ye un dreito humano que se le niega, en o Estau espanyol, a millons de ciudadans y ciudadanas con impedimentos de tot tipo pa vivir y usar-la en os servicios de tot tipo: salut, comercials, administrativos u tramites chudicials. Asinas prencipia lo manifiesto 'Frent a l’ofensiva' suscrito per los prencipals achents socials a favor d'o catalán, lo galego, l'asturiano y l'aragonés -AC Nogará (Aragón), Òmnium Cultural (Catalunya), A Mesa pola Normalización Lingüística del gallego, Acció Cultural del País Valenciá, Escola Valenciana, Obra Cultural Balear, Xunta pola Defensa de la Llingua Asturiana e Iniciativa pol Asturianu-, con o cual anuncioron la suya adhesión a la manifestación de Euskalgintzaren Kontseilua celebrada este sabado en Bilbo, y que reunió a 70.000 personas, seguntes informa Naiz.
La manifestación de Bilbo yera convocada en protesta per las recients sentencias contra la normalización de l'euskera, "retallando conquistas lingüisticas democraticas en concellos, administracions y institucions, de gran demanada social". En a mobilización, Kontseilua reivindicó "un alcuerdo sociopolítico a favor de l'euskera" pa "fer frent no nomás a la embestida, sino a los grans retos d'o futuro de l'euskera".
🪧 Hemos acompanyau a las nuestras companyeras/os vascos de @kontseilua en Bilbao, y a resta d'asociacions per a luenga.
💪🏻 Frent a l'ofensiva chudicial que mira d'espaldar os dreitos alcanzaus en decadas, evitando poder vivir en a luenga propia #euskara #aragonés 🗣️ pic.twitter.com/tOxD6UFowj— Nogara Religada (@AC_Nogara) November 4, 2023
En este sentiu, Nogará, Òmnium, A Mesa pola Normalización Lingüística del gallego, Acció Cultural del País Valenciá, Escola Valenciana, Obra Cultural Balear, Xunta pola Defensa de la Llingua Asturiana e Iniciativa pol Asturianu, denuncian en o suyo comunicau que "lo escrutinio a lo cual ye sozmetiu cualsequier abance en a presencia y disposición d'as luengas diferents a lo español, en toz los ambitos d'a vida social, en o proceso de normalización lingüística, contrasta con a inacción en l'aplicación y concreción d'as escasas normas que las amparan, incluyindo acuerdos como la Declaración Universal d'os Dreitos Lingüisticos u tractaus internacionals como la Carta Europea d'as Luengas".
Asinas, las asociacions de desfensa d’as luengas minorizadas en o Estau advierten que "asistimos a unatra ofensiva encabezada per lo poder chudicial, arrogant en a suya incapacidat pa conoixer y usar las nuestras luengas, y que s'atribuye la capacidat exclusiva de decidir án, cómo, cuán y pa qué han d'existir, retallando conquiestas democraticas pa la igualdat aconseguidas con gran emparo y demanda social".
"Frent a esta ofensiva nomás tenemos la voluntat democratica y colectiva que mantiene vivos los nuestros idiomas", remarcan. "No podemos permitir que ganen en os tribunals lo que son incapaces de ganar en os nuestros lugars. Amenestemos abanzar mas, con pasos politicos firmes y decidius pa eliminar totas las discriminacions, toz los limites, coaccions y incherencias y asegurar la vida con libertat, igualdat y chusticia en as nuestras luengas", rematan.
