No ha estau tan difícil, tan nomás yera una cuestión de voluntat politica, de complimiento d'a etica publica y de respecto a la cultura y amor a las luengas. Lo Congreso d'os Deputaus y Deputadas debatirá, y previsiblement aprebará, en un pleno la semana vinient la posibilidat d'expresar-se en o suyo idioma a los representants democraticos aragoneses y d'atros territorios.
L'aragonés será uno d'os idiomas cuyo uso será permitiu, pero mientres los idiomas cooficials: castellán, catalá, galego y euskera contarán con un servicio de traducción, las personas que empleguen l'aragonés, u la resta d'idiomas no cooficials, habrán de traducir los suyos discursos y escritos.
Como ranque d'estes nuevos dreitos lingüisticos, s'implementará una solución provisional: contratar a la mesma interpresa que ofreix lo servicio de traducción en o Senado. Pero en un plazo maximo de seis meses, se desenvolverá un sistema propio que guarencie un funcionamiento lechislativo normalizau.
Respective a los idiomas encara con un estatus legal de ‘no oficials’, como l'aragonés, lo aranés u l'asturiano, la Mesa d'o Congreso ha atendiu la solicitut d'o deputau de Sumar Aragón, Jorge Pueyo, que reclamaba usar estes idiomas con normalidat. Encara que, per agora, será una ‘normalidat’ diferenciada, pus habrán d'emplegar parte d'o tiempo d'a suya intervención en traducir -ye de suposar que a lo castellán- las suyas intervencions.
La posibilidat d'usar l'aragonés en o Congreso ye sin duda un gran abance pa la normalización d'o suyo uso, y un acicate pa la luita per la supervivencia d'un d'os idiomas mas menazaus per lo periglo de desaparición d'Europa. Pero pa guarenciar los dreitos d'as personas hablantes d'aragonés ye imperativo que lo Gubierno d'Aragón actualice la suya lechislación y dote a l'idioma aragonés d'un estatus d'idioma cooficial en tot lo territorio aragonés.
"A todos aquellos represaliados, golpeados y humillados: No charrabaz mal, charrabaz dos llenguas.
No tiengaz 'vergüenya de charrar', como diva Labordeta en Un País.
Las lenguas no sólo no crean fronteras sino que, como el amor, las saltan aunque sean los Pirineos." pic.twitter.com/IejhtznkAW
— Jorge Pueyo (@jorge_pueyo95) September 14, 2023
