Novanta anyos dimpués d’a llegada d’a columna Durruti, Bujaraloz tornó iste miércoles a convertir-se en un puesto de memoria. Cerca d’un centenar de personas participaron en a primera chornada d’os actos conmemorativos dedicaus a recordar o papel que a localidat monegrina desempeñó en a Revolución social y en o frente d’Aragón de 1936, con una programación que continará dica o sabado.
L’acto d’uberura se celebró en o salón d’actos d’o lugar con a presencia de vecins y vecinas, personas arribadas dende diferents puntos d’Aragón y de l’Estau y representantes d’os colectivos organizadors. O primer en prener a parola estió Chusé Rozas, conseller de Cultura de Bujaraloz, qui dio a bienvenida a las personas asistentes y agradeixió o treballo d’as organizacions que han feito posible ista convocatoria.
Rozas recordó que o calor sofocant d’iste mes de chulio ye lo mesmo que trobaron fa novanta anyos as columnas confederals en arribar ta Bujaraloz. Evocó un lugar castigau per a sequera, as malas cullitas y a precariedat, y quiso destacar especialmente o papel d’as mullers que quedaron en o lugar mientres muitos hombres marchaban ta o frente. “Estioron ellas qui tiroron entabant o lugar, cuidando d’as suyas casas, d’a chent que arribó y d’ellas mesmas”, recordó.
Un manifiesto ta reivindicar a Revolución social
Dimpués, Rafael Toba dio paso a Sylvia Grossi, encargada de dar lectura a o manifiesto d’uberura d’as chornadas. En o suyo discurso, as entidades organizadoras reivindicoron o significau historico d’a llegada d’a columna Durruti ta Bujaraloz y d’a Revolución social que se desenvolvió en buena parte d’Aragón dimpués d’o golpe d’Estau fascista de 1936.
O manifiesto agradeixió a l’actual vecindario y a las cheneracions que los precedioron l’acullida que brindoron a las columnas confederals y defendió a necesidat de mantener viva una memoria que, según afirmoron, ha estau muchas vegadas silenciada u borrada d’os relatos oficials.
As organizadoras tamién reivindicoron o papel de Bujaraloz como un lugar clau d’a historia contemporania, dende o qual se proxectó una experiencia revolucionaria que trascendió as fronteras d’Aragón y d’o propio Estau. En iste sentiu, expresoron o deseyo de que as futuras cheneracions continen considerando a localidat como un puesto de memoria universal.
Una exposición ta amostrar a historia dende os obchectos
A las 20:00 horas s’ubrió en a Casa Torres Solanot a exposición preparada per os colectivos Historia Viva Madrid Sur y Los Rebeldes de Alcorisa. A muestra replega decenas d’obchectos procedents d’o frente y d’a retaguardia: materials recuperaus en trincheras, cartels, mapas, documentos, fotografías, periodicos y vestimenta d’epoca que permiten adentrar-se en a historia d’a guerra y d’a Revolución social.
Os organizadors explicoron que a exposición busca complementar o treballo d’investigación y divulgación que realizan as publicacions, as rutas de memoria y as iniciativas memorialistas, amostrando a historia a traviés d’os obchectos y d’os testimonios materials. Recordoron tamién o compromís d’Historia Viva Madrid Sur con a conservación y difusión d’iste patrimonio historico y con a participación en iniciativas socials y memorialistas.
Cine y memoria arredol de Juan Mariné
A primera chornada remató con a proyección d’o documental “Juan Mariné, entre luz y sombra”, dedicau a o director de fotografía y restaurador cinematografico Juan Mariné.
Con nomás quince anyos, Mariné filmó l’entierro de Buenaventura Durruti, convertindo-se con o paso d’os anyos en una d’as figuras mas destacadas d’o cine espanyol. A suya vida quedó marcada per a guerra, a represión y l’exilio, pero tamién per una intensa trayectoria profesional que lo llevó a participar en cerca de ciento cinquanta produccions cinematograficas y a convertir-se, chunto a Concha Figueras, en un referent internacional en a restauración de films.
Dimpués d’a proyección, o publico pudo participar en un coloquio con o director d’o documental, Rafael Toba, y con Concha Figueras, qui compartioron vivencias y anecdotas sobre una figura que fixo d’a innovación tecnica y d’a preservación d’o patrimonio cinematografico una manera d’entender o cine. Entre as frases recordadas mientres o coloquio, sobresalió una que resume buena parte d’a suya filosofía: “O cine le dio felicidat y él creyeba que yera a suya obligación devolver-le tot o que li heba dau”.
Un intento de provocación que no alteró as chornadas
Mientres a organización remataba os preparativos d’a primera chornada y quan encara no heba prencipiau a programación, un reducido grupo d’ultraderechistas de Vox, encabezau per o diputado en as Cortes d’Aragón David Arranz, acudió ta Bujaraloz y gravó diversos vídeos que dimpués difundió en as suyas redes socials, calificando a convocatoria d’“aquelarre anarquista” y “acto de propaganda”.
Antes mesmo de l’uberura d’as chornadas, y en a suya habitual estratechia de confrontación y crispación, o portavoz de Vox en as Cortes d’Aragón, Santiago Morón, cargó contra a convocatoria dende o Parlamento aragonés, contribuyindo a alimentar una campaña de descredito impulsada per a formación ultradereitista.
Dende CGT Aragón respondioron a ista campaña afirmando: “Los fascistas de VOX son más del golpe de Estado y del genocidio en el territorio ocupado por los fascistas”.
Pese a iste intento de provocación, a programación prevista se desenvolvió con total normalidat y con una gran participación de publico, convertindo a memoria historica y a divulgación en as autenticas protagonistas d’a chornada.
A programación contina dica o sabado
As chornadas continan iste chueves, viernes y sabado con una intensa programación cultural y memorialista. A feria d’o libro anarquista, instalada en carrera Santa Ana, reúne editorials y distribuidoras especializadas en historia social y pensamiento libertario. A ella s’amuestran rutas guiadas per os espacios de memoria de Bujaraloz, recreacions historicas, presentacions de libros, charradas sobre a Revolución social, “Mujeres Libres”, o Consello d’Aragón u as colectividatz libertarias, amás de teatro, música y cantas populars.
Entre os actos mas simbolicos destaca a colocación, o sabado, d’una placa en recuerdo d’a columna Durruti, acompañada per l’actuación d’o Coro Libertario de Torrero. A programación se completará con nuevas presentacions editorials, una chenta popular y diversos conciertos en a Plaza Mayor, que zarrarán cuatro días dedicaus a reivindicar o papel historico de Bujaraloz en a guerra de 1936 y en a Revolución social.
As chornadas son organizadas per Os Monegros —que fa nomás uns días presentó a cartografía d’a memoria d’a guerra y a Revolución social en Bujaraloz y Sarinyena—, Ateneo Libertario Xosé Tarrío, Acción Libertaria, Germinal, Historia Viva Madrid Sur, Los Rebeldes de Alcorisa, Nuestra Memoria Nuestra Lucha y L'Es Indomables Tarragona, entre atras entidades memorialistas y libertarias, con a colaboración d’o lugar de Bujaraloz.
Especial | 1936-2026: 90 años del golpe de Estado y la Revolución Social.
