Bujaraloz tornará a mirar enta la suya historia libertaria novanta anyos dimpués d’a arribada d’a columna Durruti. A localidat d’Os Monegros celebrará entre os días 22 y 25 de chulio unas chornadas d’homenache arredol d’a presencia d’as milicias confederals en o lugar, la creación d’o Cuartel Cheneral d’a columna y o proceso de colectivización viviu en buena parte d’a redolada dimpués d’o golpe d’estau fascista de 1936.
A columna Durruti arribó ta Bujaraloz o 26 de chulio de 1936 y convirtió a localidat en una pieza clave d’o sector centro d’o frente d’Aragón. Dende allí s’organizó buena parte d’a resistencia antifaixista y d’a experiencia revolucionaria impulsada per a CNT y atros colectivos obrers y populars. O lugar tamién quedó vinculau a la creación, o 6 d’octubre de 1936, d’o Consello de Defensa d’Aragón, una d’as experiencias d’autogobierno libertario mas relevantes d’a historia contemporania aragonesa y europea.
As chornadas prencipiarán o miércoles 22 de chulio con a presentación oficial d’os actos en a Plaza Mayor y con a ubierta d’una exposición con obchetos de trincheras, cartels, fotografías, documentos y materials aportaus per vecins y vecinas. A muestra contará con visitas guiadas a cargo de Víctor Asensio, d’o colectivo “Los rebeldes de Alcorisa”, y de miembros d’a “Historia Viva Madrid Sur”. A chornada rematará con a proyección d’o documental “Juan Mariné, entre luz y sombra”, presentau per Concha Figueras y Rafael Toba, con referencia tamién a o cineasta suizo Adrien Porchet.
O chueves 23 s’ubrirá a feria d’o libro anarquista en carrera Santa Ana, con participación d’editorials y distribuidoras como Pepitas de Calabaza, Editorial Virus, Traficantes de Sueños, Descontrol Editorial, Ediciones Antorcha u Olivo del Búho, entre atras. A programación incluirá recreacions historicas con vestimenta d’epoca, una ruta guiada con codigos QR sobre puestos emblematicos d’a guerra elaborada per l’exalumnau de l’IES Sabina Albar, y a presentación d’o libro “Little Durruti. Un libro para salvar una librería”.
Ya de tardis, as actividades continarán con ponencias sobre Ada Grossi y “Mujeres Libres”, un recital poetico titulau “Expropiar las palabras” y a proyección d’a primera parte de “Los Aguiluchos de las F.A.I.”, acompañada d’un debate sobre a importancia historica de Bujaraloz en a Guerra de 1936.
A chornada d’o viernes 24 combinará literatura, memoria historica y actos culturals. Habrá teatro de titeres enta ninos y ninas, presentación d’o libro “Dones del foc”, una excursión t’as salinas y nuevas ponencias arredol d’a colectividat de Blesa, o Consello d’Aragón u a historia d’o libertario alcorisano Manuel Espallargas. A nueit rematará en a Plaza Mayor con conciertos y cantas populars a cargo d’El Cos, Moita Makinaria, Gato Azul, Clara Costa y Marmo.
O sabado 25 de chulio se fará l’acto mas simbolico d’as chornadas: a colocación d’una placa en recuerdo de Durruti con l’actuación d’o Coro Libertario de Torrero. A programación continará con nuevas presentacions de libros, entre eles “Rumbo a Zaragoza, crónica de la Columna Durruti”, “8 días de julio” u “La quinta de los Piales”, amás d’una ponencia d’Agustín Guillamón sobre revolución y contrarrevolución en Catalunya entre 1936 y 1938. A clausura incluirá teatro de titeres ta personas adultas, una chenta popular y conciertos en a Plaza Mayor.
As chornadas son organizadas per colectivos como Os Monegros —que recentment ha presentau a cartografía d’a memoria d’a guerra y a Revolución social en Bujaraloz y Sariñena—, Ateneo Libertario Xosé Tarrío, Acción Libertaria, Germinal, Historia Viva Madrid Sur, Los Rebeldes de Alcorisa, Nuestra Memoria Nuestra Lucha y L’Es Indomables Tarragona, entre atras entidades memorialistas y libertarias, con a colaboración d’o lugar de Bujaraloz.
