Dende fa semanas s'han produciu manifestacions y concentracions en as comarcas aragonesas pa protestar per la situación que s’avecina lo próximo curso. "Estes retalles van a repercutir en os desdobles, apoyos y prochectos que no podrán desenrrollar-se, puesto que no se cumplen los cupos de profesorau previstos tanto per los centros d’Educación Infantil y Primaria como en los de Secundaria", advierten dende SOA.
La “reorganización y reasignación” propuesta per l'actual gubierno aragonés de Jorge Azcón "afectará especialment a lo alumnado con més dificultaz y con necesidaz específicas". Tamién a los Colechios Rurals Agrupaus, "an que no s’han teniu en cuenta las suyas peculiaridaz, puesto que los docents han de trasladar-se d’una siede enta un atra, y las ratios son més baixas pero concentran 9 nivels dintro de cada aula, en o caso d’as unitarias. En muitas d'estas unitarias se preveyeban 1,5 u incluso 2 mayestros u mayestras pa, a lo menos, poder deseparar Infantil de Primaria, pero sorpresivament s’han quedau con un mayestro u mayestra pa tota la siede", contina lo sindicato.
Per tot ixo, dende SOA Sección Ensinyanza manifiestan un "total desacuerdo" per estas medidas que, "encara que se subsanen de cara a setiembre, provocarán un difícil comenzo de curso ya de normal complicau en nuestros centros escolars", asinas como "preocupación per la carga de treballo y estrés en verano a los equipos directivos, que pasarán este periodo preocupaus per tener los horarios sin fer y las necesidaz sin cubrir".
