La entidat Ecolochistas en Acción (EeA) ha lanzau la campanya “Dreito Alimento” pa reivindicar “una alimentación sana, cercana y de calidat”. Entre cuantos días, irán lanzando en os suyos rez socials animacions y viñetas, feitas a man per l'aragonés Xcar Malavida, y nuevos contenius,
Per lo dreito a una alimentación sana, cercana y de calidat
“L'agricultura, la ganadería y la producción de alimentos tienen gran impacto en o meyo ambient y tiene muito que veyer con cómo se produz en l'actualidat en o contexto d'un mundo globalizau y capitalista”, aseguran dende EeA.
Lo proceso de globalización ye fundamental pa comprender cómo la intensificación d'estas actividaz han suposau la degradación ambiental. Los modos de producir, distribuyir y consumir en un mercau globalizau implican que los alimentos recorren largas distancias antes de plegar a los nuestros fogars, cheneran grans impactos -como la deforestación-, y degradan y contaminan un bien común como ye l'augua u la tierra, acotolando la fertilidat d'os suelos y representando tamién una cuarta parte de nuestra factura global de gases d'efecto invernadero.
Entremistanto, l'actual modelo agroalimentario neoliberal “se riche per aconseguir los maximos beneficios economicos pa los grans conglomerados d'o sector mientres provoca desigualdad en a cadena de valor d'os alimentos, promociona formas de vida malsanas y impide l'acceso a millons de personas a alimentos de primera necesidat y de calidat”, recalcan.
“Pero i hai atras formas de producción, distribución y consumo que satisfan millor las necesidaz humanas y cudian lo planeta: charramos d'a sobiranía alimentaria y l'agroecolochía”, destacan.
“No podemos permitir que un bien común como l'augua se contamine”
Sabebas que lo exceso de fertilizants en a tierra y la mala chestión d'os mesmos ye contaminando un bien común esencial: l'augua?
Las auguas superficials, las que veyes. y las subterranias, las que no veyes, presientan elevaus libels de contaminación per nitratos (consecuencia de excedentes de productos inorganicos y organicos usaus como fertilizants).
EI nitrato ye un component quimico que forma parte d'o suelo y d'as auguas, y ye un nutrient pa las plantas y los microorganismos. En os cultivos, gran parte d'o nitrato procede d'os fertilizants nitrochenaus organicos y minerals. Manimenos, cuan la cantidat d'estes fertilizants excede a las necesidaz d'o cultivo, tiene consecuencias negativas: se produz una acumulación de nitrógeno mineral en o suelo con o risgo de lixiviación posterior.
“Esto implica una degradación en a calidat de l'augua y, per tanto, una afección directa pa la nuestra salut y la d'os ecosistemas. Amás, en un escenario de cambio climatico y escasez, no podemos permitir que este bien común se contamine”, enfatizan dende Ecolochistas en Acción, y anyaden que “tenemos suficients datos pa saber que existe un problema y que la nuestra salut, la d'os nuestros territorios y las reservas d'augua, son en problemas”.
Lo control analitico de 2022 indica que lo 37 % d'as auguas subterranias y l'11 % d'as superficials son contaminadas per nitratos con concentracions superiors a la norma de calidat ambiental. En 171 municipios d'o Estau espanyol responsables d'o suministro d'augua potable se detectó, en bella d'os suyos rez de distribución, valors de nitratos per alto d'os 50 mg/l permitius per la normativa, afectando dreitament a 214.851 personas. Recients estudios sinyalan que lo limite maximo establiu de 50 mg/l de nitratos en augua de consumo humano no ye pro precautorio y habría de reducir-se pa protecher la nuestra salut.
“Lo exceso de nitrato (NO3) ye toxico cuan se transforma en nitrito (NO2), tanto en alimentos como en l'organismo. En os sistemas de tractamiento d'auguas pa consumo humano amaneixen derivaus cloraus (cloroformo, trihalometanos) que son toxicos y cancerígenos. La contaminación de l'augua provoca que sía inservible pa atros usos”, explican dende EeA.
Los retos per debant
“L'augua limpia ye indispensable pa la salut humana y os ecosistemas naturals, de traza que la calidat de l'augua ye un d'os elementos mas importants d'a politica medioambiental d'a Unión Europea”. Asinas empecipia l'apartau d'a Comisión Europea sobre la Directiva de Nitratos (91/676/CEE). Las medidas que lo Estau espanyol ha enchegau dica lo momento no han estau suficients pa frenar esta contaminación. Entre anyos, s'ha incompliu la lechislación comunitaria y per ixo la Comisión Europea ha ubierto cuantos procedimientos d'infracción contra lo Estau espanyol.
“Lo prencipal reto radica en limitar lo creiximiento desmesurau d'explotacions de ganadería industrial, meter fin a lo ‘cuanto mas, millor’ en o consumo de fertilizants quimicos y conseguir una chestión equilibrada d'os fertilizants organicos cercanos”, proposan dende EeA. Tal como replega lo suyo zaguer informe publicau per lo Ministerio, pa conseguir los obchectivos medioambientals d'a Directiva Europea de Nitratos, ye necesario adoptar reduccions d'os excedentes de nitrógeno mas ambiciosas que las inicialment consideradas, estimadas en un 25 % respective a las actuals.
“Lo control analitico que realizan las administracions competents ye insuficient. Ha d'amillorar-se sin dilación lo control d'a contaminación per nitratos de fuents publicas no tratadas y manantiales que son habitualment utilizaus per la ciudadanía”, recalcan.
“Tenemos los datos y las razons, y queremos solucions. Las personas podemos reducir lo nuestro consumo individual de carne y triar carnes procedents d'o modelo agroganadero que queremos, pero tamién exichimos que las grans interpresas y corporacions d'o sector cárnico deixen d'atentar contra los nuestros bienes comuns”, sinyalan dende EeA.
“Exichamos la reducción de residuos y la suya chestión de forma selectiva y eficaz”
“Existen dos fuents d'enerchía, lo biogás y lo biometano, que poco a poco van ganando terreno a las renovables. Per ixo, las grans interpresas y fondos d'inversión especulativos son muito intresaus en este negocio”, sinyalan dende EeA, “manimenos, se trata de combustibles que tamién tienen muito impacto. Se producen a traviés d'a descomposición anaerobia (sin oxígeno) de materia organica (residuos agricolas, ganaders y agroindustrials, lodos de depuradoras y residuos domesticos”.
Pueden emplegar-se en mobilidat, cheneración electrica u en sistemas de calor y enerchía, substituyindo combustibles d'orichen fósil, per ixo forman parte d'a transición enerchetica y d'a economía circular. Lo biometano ye una forma purificada y refinada de biogás, que se puede inyectar en os rez de gas natural.
“Ye important que sían instalacions de grandaria concorde con as cantidaz de residuos ganaders, domesticos y lodos que se cheneran en a redolada perque s'ameneste un suministro constant pa que las plantas de biometanización sían sostenibles economicament”, destacan.
En un momento en o cual la preocupación per lo cambio climatico y la contaminación ambiental ye mas urchent que no nunca, ye crucial explorar alternativas que no nomás reduzcan la nuestra dependencia d'os combustibles fósiles, sino que tamién minimicen lo impacto negativo en o nuestro entorno natural.
“Lo biogás y lo biometano son tecnolochías prometedoras que pueden contribuyir a la transición enta un sistema enerchetico mas sostenible y respectuoso con o meyo ambient. Manimenos, ye important considerar la suya implementación en o contexto mas amplio de l'agricultura y la ganadería industrial, y buscar solucions integrals que aborden los desafíos ambientals de traza holística”, resaltan dende EeA.
Cómo se produz lo biogás y lo biometano?
Lo biogás ye un combustible produciu a traviés d'a descomposición anaeróbica de materia organica, como residuos agricolas, estiércol, restas de minchada y desechos de plantas de tractamiento d'auguas residuals, entre atros. Este proceso chenera una mescla de gases, prencipalment metano y dióxido de carbono, que pueden estar capturaus y utilizaus como fuent d'enerchía.
Per unatro costau, lo biometano ye una forma purificada y refinada de biogás, en a cuala s'elimina lo dióxido de carbono y atros contaminantes, deixando prencipalment metano. Este biometano puede estar inyectado en o ret de gas natural u utilizau como combustible pa vehíclos.
Qué relación puede tener lo biogás y biometano con a ganadería industrial?
Dende una perspectiva ecolochista y de defensa d'a naturaleza, la relación entre lo biogás y la ganadería industrial ye complexa. Per un costau, la ganadería industrial produz grans cantidaz de fiemo y atros residuos organicos, que pueden estar utilizaus como materia prima pa la producción de biogás, reducindo asinas la contaminación y las olors asociadas a estes desechos.
“Manimenos, ye important sinyalar que la ganadería industrial tamién ye asociada con una serie de problemas ambientals, como la deforestación, la contaminación de l'augua, d'os suelos y de l'aire y la perda de biodiversidat. Per tanto, si bien l'uso de biogás puede aduyar a mitigar beluns d'os impactos negativos d'a ganadería industrial, no ye una solución completa y s'han d'abordar los problemas estructurals d'este sistema de producción animal”, aseguran dende Ecolochistas en Acción.
“Renovables chustas con o territorio: exichimos un modelo bien planificau y distribuyiu en cuenta d'un negocio pa uns pocos”
Encara que las renovables son necesarias pa enfrontinar la emerchencia climatica “los gubiernos han deixau en mans d'as interpresas decidir án y cómo s'instalan y ¡sorpresa! han decidiu buscar la mayor rentabilidat posible, repetindo las errors que nos han traito a la crisi actual”, enfatizan dende EeA.
“Somos testigos d'o aluvión de malos prochectos de parques eolicos y fotovoltaicos que ocupan lo territorio y tienen efectos sobre la biodiversidat y los nuestros modos de vida. Cuan se deixa los prochectos a grans interpresas y fondos d'inversión, surten los problemas como zonas de concentración de prochectos, ocupación d'espacios d'alta valor ambiental y agrario, u expropiacions infundadas y inchustas. Fa falta una reforma profunda d'o sistema enerchetico an se prime la democratización, lo autoconsumo y la cheneración mas descentralizada y sostenible posible”, enfatizan. Las plantas de biogás y biometano “pueden aduyar a la transición enerchetica chusta que queremos. Pero, pa ixo, s'ha d'afavorir lo autoconsumo en industrias ya instaladas, usar residuos que s'han triau bien previament, y utilizar-se en puestos cercanos a la suya producción”.
“I hai muitos diners publicos presupuestaus, exichamos que s'oriente bien a prochectos sostenibles! Lo mesmo ye pasando con las plantas de biogás y biometano. La tecnolochía no tiene per qué estar negativa. Convertir residuos en enerchía ye bella cosa que se leva anyos practicando y puede estar bueno pa la transición ecolochica chusta que queremos. Se podría priorizar l'uso d'o biogás en localizacions cercanas a la la suya producción, pa afavorir lo autoconsumo d'industrias ya instaladas, pa chestionar millor os suyas residuos”, recalcan.
Los problemas surten cuan “lo modelo de negocio pa uns pocos no busca una millor chestión d'os residuos dentro d'una chestión descentralizada y sostenible, sino que pretende la traza d'aconseguir mas y mas beneficios. Per ixo, cal analisar cada prochecto caso a caso, pa privar prochectos insostenibles que fomenten lo modelo agroindustrial que queremos aturar”, destacan.
La propia Directiva Europea de Renovables II (DERII) estableix criterios de sostenibilidad pa biocarburantes, biolíquidos y combustibles de biomasa, como lo biogás, “con a finalidat de privar que se fabriquen a partir de materias primas producidas con practicas agricolas no compatibles con a protección d'a calidat d'o suelo, procedents de zonas con una rica biodiversidat u con elevadas reservas de carbono u obtenidas per medio d'una chestión forestal no sostenible”. Ye decir, esta condición mete en cuestión l'uso de residuos de purines y estiércoles -fiemo- que provienen d'a ganadería industrial en zonas saturadas que ya producen problemas de contaminación d'as auguas per exceso de nitratos. Los purines y lo fiemo pueden estar una excelent fuent de fertilización d'a tierra, per medio d'un buen uso, sin necesidat d'estar trataus en plantas de biogás. “Tampoco tiene sentiu que las plantas de biogás dependan d'a plegada de residuos leixans, a muitos kilometros de distancia. Y muito menos que i haiga un refuso d'a población local d'os prochectos en marcha. No se puede acceptar como sostenibles cualques prochectos que no son neutros en emisions, perque amenesten enerchía fósil en os suyos procesos”, enfatizan dende Ecolochistas en Acción.
“S'ha de privar que la instalación de plantas de biometanización se transforme en un efecto clamada a mas instalacions ganaderas pa disposar de mas residuos agroganaderos. Un eixemplo: ye lo ‘boom’ de las plantas de biogás un “efecto clamada” pa macrogranjas?”, detallan.
Biogás y biometano: unatro negocio pa uns pocos financiau con diners publicos
Lo Ministerio pa la Transición Ecolochica y lo Reto Demografico ha atorgau decenas de millons d'euros (76,5 solo en a primera convocatoria d'aduyas) a prochectos d'instalacions de biogás. Estes fondos provenientes d'o Plan de Recuperación, Transformación y Resiliencia, financiau con fondos Next Generation d'a UE, corresponden a una inversión prochectada de 475,5 millons d'euros y una potencia total a instalar de 188,3 MW. Estas aduyas, chestionadas per l'Instituto pa la Diversificación y Estalbio d'a Enerchía, son a fondo perdiu y lo mayor numero de propuestas subvencionadas son en Catalunya (27), en nuestro país Aragón (11) y Andalucía (9).
Los plans d'o Ministerio son convertir los residuos en recursos pa valorizar y chenerar actividat empresarial y emplego, especialment en zonas despobladas. Lo sistema consiste en o tractamiento anaerobio de materia organica depositada en vertederos, lodos de depuradoras urbanas, residuos agrarios, purines ganaders, restas d'actividat forestal u d'a industria agroalimentaria, entre atros variaus ambitos d'orichen.
“Lo Estau espanyol ye un d'os tres estaus d'a Unión Europea con mayor potencial de producción de biometano, cualques estudios lo sitúan entre 120 y 160 Twh. Seguntes los prochectos anunciaus, en 2027 dentrarán en funcionamiento 92 plantas de biometano con una capacidat de producción de 5.000 GWh/anyo (lo que multiplica per 10 la capacidat de producción actual)”, detallan dende EeA.
GASNAM: Mapa de plantas de producción de biometano
Per una dieta equilibrada pa totas las personas d'o mundo
Sabebas que seguntes la Organización d'as Nacions Unidas pa l'Alimentación y l'Agricultura (FAO), en o Estau espanyol se minchan 100 kilos de carne per persona a l'anyo?
Estas cifras son muito luen d'as recomendacions d'a Organización Mundial d'a Salut, sobre un consumo de carne de 21 kilos (seguntes datos de 2021). Lo Estau espanyol ye lo seteno d'o mundo y lo primero d'Europa en consumo de carne, seguntes la FAO.
A libel mundial, la UE ye lo segundo productor de carne de porcino, dimpués de China, y lo Estau espanyol ye, en particular, la cuarta potencia productora (dimpués de China, EUA, y Alemanya). A libel europeu, lo Estau espanyol ocupa lo segundo en producción con un 19 % d'as toneladas producidas (datos 2018, Fuent: EUROSTAT y SG Analisi, Coordinación y Estatistica, MAPA), per dezaga d'Alemanya, y ye lo primer estau d'a UE en censo, con amán d'o 21 % d'o censo comunitario (datos 2018, Fuent: EUROSTAT y SG Analisi, Coordinación y Estatistica, MAPA).
“Lo modelo agroganadero imperant en os zaguers anyos ha imposau un sistema d'integración vertical, con menos granjas que tienen mas animals. Una proliferación de granjas grans y integradas, en as cualas las personas agricultoras y ganaderas han perdiu la suya sobiranía y son las grans interpresas multinacionals las que controlan los animals, piensos y servicios d’albeitars”, recuerdan dende Ecolochistas en Acción.
En o Estau espanyol i hai mas tocinos que en cualsequier atro estau d'a Unión Europea (UE). En 2021 se plegó a la cifra récord de 58.600.000 cochins sacrificaus. Lo Estau espanyol ye lo mayor productor d'a UE y lo tercer mayor exportador mundial (nomás superaus per estaus muito mas grans como China y Estaus Unius), con cientos de granjas en Catalunya, Aragón, Murcia, Castiella y Leyón, Castiella-La Mancha, Andalucía, Galiza u País Valencià.
“La ganadería industrial ye un modelo de producción animal que se basa, en masiaus casos, en: la elevada concentración d'animals en espacios reducius. Que las materias primas pa l'alimentación d'o bestiar proceden, en gran parte, de recursos leixanos. L'abuso de antibióticos y atros tractamientos sanitarios. La cheneración d'una important cantidat de purines, concentrada en o espacio, con muito alto percentache de nitratos que superan las necesidaz de fertilización d'os cultivos d'a redolada. Lo control d'a producción, la transformación y la comercialización per grans interpresas agroalimentarias que a ormino se mueven en os mercaus internacionals.
Os impactos d'a ganadería industrial son ambientals (contaminación d’augua per purines, emisions de GEI, emisión de amoniaco, perda de fertilidat d'a tierra), de salut publica (resistencia a antibióticos, malotías respiratorias en población rural per lo amoniaco, malotías cardiovasculars, cáncer colorrectal, diabetes y obesidat per la dieta alta en productos d'orichen animal), socioeconomico (derrumbe d'a economía local rural, despoblación) y de buenestar animal (amuntonamiento d'animals, risgo de malotías y zoonosis).
Carne, contaminación y salut
La Corporación Alimentaria Guissona, El Pozo, Incarlopsa, Campofrío y Litera Meat son las interpresas líders en a industria estatal d'a carne, con facturacions millonarias. Las 20 primeras suman mas de 14.000 millons d'euros de facturación, que va a la par que los impactos que producen las suyas instalacions, seguntes los zaguers datos disponibles en o rechistro mercantil.
“Se trata de grans interpresas que s'enriqueixen a costa de degradar lo territorio y acotolar suelos, fuents d'augua, la nuestra salut y la d'os nuestros ecosistemas. Los prencipals contaminantes de l'augua per la industria cárnica son los productos quimicos, los fertilizants, los desechos animals y los pesticidas. Los desechos de antibióticos y hormonas d'actividaz humanas y ganaderas tamién contaminan las auguas. No nomás la ganadería, tamién lo turismo”, recalcan.
“Amás, lo sector ganadero produz una tercera parte d'o nitrógeno y d'o fósforo que contaminan l'augua, dos terceras partes d'o amoniaco que contribuye a la plevida ácida y a l'acidificación d'os ecosistemas, y lo 37 % de tot lo metano produciu per l'actividat humana”, detallan.
Amenestemos una transformación radical d'os sistemas alimentarios
“Pa empecipiar, quitando los alimentos d'as dinamicas d'os mercaus. Pa descarbonizar la economía y reducir la nuestra dependencia d'os combustibles fósiles, ye fundamental caminar enta l'agroecolochía, consumir de cercanía (lo mas que se pueda), privar alimentos que vienen de l'atra punta d'o mundo, aumentar lo estalbio d'enerchía y las enerchías renovables, de forma descentralizada y sostenible, pa amillorar la eficiencia y reducir lo consumo”, destacan.
“Queremos que totas las personas puedan acceder a alimentos que nutran y que no enfermen. Garra persona quiere minchar malament, pero no totas las personas pueden triar-lo. Las situacions socioeconomicas son determinants pa prener decisions alimentarias. Nos rodeya un aluvión de publicidat, productos y establimientos de minchada rapida, ensucraus y procesaus, que levan a las personas a una alimentación deficient u insana”, enfatizan dende EeA, “per ixo, luitamos per la chusticia social, con educación, recursos economicos y tiempo pa cocinar. Las solucions no son individuals, son globals y estructurals”.
Ecolochistas en Acción reivindica “lo dreito a un consumo responsable y de proximidat, fomentar la venda directa en mercaus y comercios locals, grupos de consumo y supermercados cooperativos, compras publicas eticas, cláusulas socials y medioambientals en a contratación publica, y una restauración colectiva saludable y de calidat”.
“Queremos una dieta saludable pa totas las personas y en tot lo planeta: mas verduras, legumbres, fruitas y cereales, menos alimentos procesaus y ensucraus, consumo equilibrau de carnes procedents d'o modelo, queremos alimentos locals, de temporada, con menos envases y desperdicio d’alimentos, pescaus de pesca sostenible, productos ecolochicos”, relatan.
Dende Ecolochistas en Acción aseguran que “cada vegada i hai mas resistencias a lo modelo agroganadero industrial, con plataformas vecinals como la Coordinadora estatal Stop Ganadería Industrial, y con organizacions como Ecolochistas en Acción, que realizan accions, campanyas informativas y incidencia politica”.
“Denunciamos los impactos d'este modelo, nos movilizamos contra prochectos negativos y nos esforzamos en difundir y exichir alternativas pa un cambio de l'alimentación y d'a producción agroganadera. Entre las alternativas, esfendemos un mundo rural vivo y la ganadería extensiva tradicional, que afavoreix la biodiversidat, apreviene incendios, crea emplego agrario de calidat y mitiga lo cambio climatico”, concluyen.
