Lo Diploma d'Especialización en Filolochía Aragonesa d'o Campus de Uesca de Unizar, ubrió este pasau martes, 1 d'octubre, la suya catorcena edición. La escritora en aragonés Ana Giménez Betrán, estió la encargada d'impartir la lección inaugural, que dedicó a la poetisa y narradora d'o sieglo XVII Ana Abarca de Bolea, que uso tamién l'aragonés en parte d'a suya obra. Presidió l'acto Javier Zaragoza, decano d'a Facultat de Ciencias Humanas y d'a Educación, centro an s'imparte este postgrau, acompanyau per la directora d'este estudeyo, Iris Campos Bandrés.
José Ángel Sánchez Ibáñez, profesor de Literatura d'o Diploma d'Especialización en Filolochía Aragonesa, introdució la ponencia d'Ana Giménez, docent amás d'escritora, que acaba de publicar un libro sobre la figura d'Abarca de Bolea en a colección Vidas y Semblantes d'a editorial Aladrada, enfocada a la difusión de figuras clau en a historia de l'aragonés.
Este postgrau, que estió la primera titulación universitaria sobre l'idioma aragonés, ye reconoixiu como nivel B2 d'o Marco Común Europeu de Referencia lingüistica (MCER) per lo Departamento d'Educación, Cultura y Esporte d'o Gubierno d'Aragón.
A lo largo d'un curso, s'abordan aspectos como la formación y desembolique de l'aragonés, la suya morfolochía y sintaxi, la suya literatura, las metodolochías pa la suya ensenyanza u la suya situación sociolingüistica. La formación teorica queda completada con as practicas que pueden desenvolver-se en as entidaz colaboraderas con o postgrau u desenvolvendo investigacions u treballos monograficos arredol de l'aragonés.
Las clases, que dau lo suyo carácter semipresencial se pueden seguir en directo, a traviés d'internet, se desenvuelven entre los meses d'octubre y abril, los martes, mierques y chueves de 17.30 a 21.30 horas. Y entre mayo y chunyo se desenvuelven las practicas.
Titulados y tituladas de muito variadas disciplinas -entre las cualas destacan las relacionadas con a ensenyanza, la lingüistica, la traducción u la comunicación- cursan este postgrau. La mayoría proceden de distintos puntos d'a cheografía aragonesa, pero toz los anyos los i hai tamién d'atros países.
Una parte han cursado anteriorment las atras ensenyanzas que ofreix lo Campus de Uesca actualment en l'ambito de l'aragonés: la especialidat d'ixa luenga en Magisterio d'Educación primaria u d'Educación Infantil, u las asignaturas complementarias d'introducción a l'aragonés en as cualas puede matricular-se lo estudiantado d'os suyos graus. Amás, “gracias a la colaboración d'a Deputación de Uesca, lo alumnado que se matricula accede a una reducción d'o pre d'a matricla, que lo suyo coste ye de 398 euros (mas taxas administrativas)”, destacan dende la organización.
IX Trobada d'Estudios e Rechiras arredol d'a Luenga Aragonesa y a suya Literatura
Tamién esta semana l'Instituto de Estudios Altoaragoneses d'a DPU, en colaboración con a Facultat de Ciencias Humanas y d'a Educación d'o Campus de Uesca, lo Centro de Profesorado Ana Abarca de Bolea y lo Consello d'a Fabla Aragonesa organiza la IX Trobada d'Estudios e Rechiras arredol d'a Luenga Aragonesa y a suya Literatura. Los días 3, 4 y 5 d'octubre tendrá lugar en Uesca este congreso, que coordinan un equipo d'especialistas d'ixas entidaz, que son en a suya mayoría profesors d'o Diploma en Filolochía Aragonesa.
Una treintena de ponencias y comunicacions se presentarán en esta trobada, que naixió en 1997 con a intención de reunir cada cierto tiempo a estudiosas de l'aragonés, pa realizar intercambios de treballos y experiencias y empentar asinas los estudios y investigacions arredol d'a luenga aragonesa y la suya literatura.
