Europa conta con mas de 200 luengas autoctonas y muitas mas charradas per ciudadans y ciudadanas orichinarias d'atros continentes. “Este ye un important recurso y una riqueza que ha d'estar reconoixida, utilizada y valorada”, recalcan dende lo Rolde de Estudios Aragoneses.
Lo Día Europeu d'as Luengas convocau per lo Consello d'Europa “trata de dar visibilidat a totas ellas, entre las cualas se troban las nuestras dos luengas minoritarias, aragonés y catalán d'Aragón, unindo-nos asinas a la resta d'os pueblos europeus que aprecian lo multilingüismo como una riqueza”, y per ixo animan “a totas las personas a conoixer-las y estudiar-las”.
Fendo-se eco d'ixa realidat y d'as valors que animan a esta celebración, l'asociación cultural Rolde de Estudios Aragoneses ha organizau una sesión en a cuala los asistents podrán desfrutar d'o cortometrache ‘Arcadia’ y d'o documental ‘Cuan lo mon cambia’.
Arcadia, endrezau per Carlos Baselga, recrea un tema musical a cargo d'o grupo de folk La Orquestina d'o Fabirol, y obtenió en 2020 l'II Premio Antonio Artero de video en luenga aragonesa d'o Gubierno d'Aragón.
En Cuan lo mon cambia (Asociación Guayente, Fundación Hospital de Benasque y Nómada Producciones Audiovisuales), Carmen Castán y Javier Moreno amanan a lo espectador la transformación de l'agricultura y la ganadería en a Val de Benás a lo largo d'o sieglo XX, a traviés d'a visión d'os suyos vecins. Este audiovisual ha estau prochectau en cuantas localidaz de Ribagorza entre este verano, y tiene agora lo suyo enguero en Zaragoza.
Con este acto, as organizadoras pretenden “testimoniar la diversidat lingüistica” d'o nuestro país “como un elemento de singular valor y riqueza patrimonial, y bella cosa vivo y cutiano”. L'acto se celebrará “en a siede d'a Universidat Sant Chorche, edificio Santo Valero en a plaza Santa Cruz de Zaragoza, lo chueves 26 de setiembre a las 19.00 horas”.
