L'Asociación Cultural Nogará Religada fació 30 anyos en 2021. Dimpués de tres decadas estando tamién escuela d'aragonés, en a suya siede, en o barrio zaragozano d'a Madalena, se fan cursos en diferents nivels, antimás de variadas actividatz y prochectos pa promover a nuestra luenga.
Encara que ye estau un anyo embolicau, Nogará no querió deixar de celebrar o suyo 30 aniversario. Asinas, en 2021 continó con a realización d'as suyas chornadas anuals, a publicación de nuevo conteniu en aragonés y o treballo en o recopilatorio de grupos d'Aragón cantando en aragonés “O Zaguer Chilo”, que en as suyas cinco edicions ha achuntaua más de cient bandas y que este anyo s'ha colau en o puesto deciséis d'os discos más votaus en a lista d'Aragón Musical.
Pa rematar un anyo redondo y como guinda a la suya celebración, Nogará publicó o 31 d'aviento, en os suyos retes socials, un videoclip commemorativo con una nueva canción de rap en aragonés que i meten voz y letra Krevi Solenco y Elena Martínez (Los Ases del Jiloca, Venambre, La Birolla). Un tema do se resume tot o treballo de Nogará y os puestos con que colabora y empara, con o solo obchetivo de vivir en aragonés.
30 anyos d'escuela d'aragonés: "30 anyos de treballo voluntario fendo servir a luenga d'esta tierra, de conchunta sin reblar, luitando por ella, totz y todas chuntas continamos, si, d'estrela a estrela. 30 anyos d'asociación, d'amistatz y familias que astí dentro se fación. 30 anyos plenos de buena chent. Brindemos por atros tantos, por l'aragonés", diz a letra de rap.
De feito, Nogará ya ha anunciau que en 2022 seguirá "luitando y abanzando por o dreito de charrar en aragonés, por a chent que lo charraba amagada, por as personas que luitoron por charrar-la, por o camín feito en este trecenal, por l'aragonés oficial". "Per lo que fuemos, per lo que somos, per la dignidat d’a nuestra luenga. Son las nuestras radices, deixa-las creixer toz chuntos vivamos en aragonés. Tantismo treballo como ganas de fer, y prebar d'amostrar que l'aragonés ye vivo. Un fascal de tiempo, nomás un motivo: charrar-lo pues ye a pocas de dixapareixer", anyade a letra.
A canción "Nogará: 30 anyos d'escuela" ye gravada entre Zaragoza y Calamocha "chunto con muita chent polida", con os scratchings de Dj Diamond Ex, y mesclau y masterizau por Sergio Lacasia en Lacasia de la Música. O videoclip ye estau dirichiu por Nofres y a mosica producida por Oroel Otal en Arga Music Studio.
Articlo traduziu a l'aragonés por Krevi Solenco y Nogará.
