Mas d'un milar de cumbres d'o Pireneu y lo Prepirineo aragonés figuran ya con o suyo nombre orichinal en OpenStreetMap, respectando lo dominio lingüistico en o qual se troban, bien sía de l'aragonés d'o catalán d'Aragón. La Dirección Cheneral de Politica Lingüistica d'o Gubierno d'Aragón ha desenvuelto este prochecto de depuración de toponimos con a colaboración d'un equipo cartografico endrezau per lo geólogo aragonés Pau Arbués.
Entre los toponimos recuperaus se troban qualques como “Tusal de Bocs” (dinantes Pico Box), “Punta d’Añes Cruzes” (dinantes Pico Agnes Cruces), “Mallo de Marmorés” (dinantes Cilindro de Marboré), “Punda dero Espaldador (dinantes Pico d'a Espalda) u “Tuca d’els Corvets” (dinantes Pico Escorvets).
OpenStreetMap (OSM) ye un prochecto internacional que s'encetó en 2004 con l'obchectivo de creyar un mapa gratuito d'o mundo basau en aportacions desinteresadas d'a comunidat. OpenStreetMap puede estar consultau en linia en openstreetmap.org y a ormino s'usa librement pa anyadir una vista d'o mapa en qualsequier pachina web.
Esta ferramienta tiene una gran difusión y ye fundamental en o desembolique d'aplicacions de reconoixencia de perfils montanyosos, las qualas etiquetan con o suyo nombre las cumbres que amaneixen vistas dende la camera d'o telefono mobil. Este tipo d'aplicacions son muito populars en o colectivo montanyero, per lo que sirven pa divulgar la riqueza toponimica aragonesa.
La Dirección Cheneral de Politica Lingüistica s'ha encargau de tresladar los nombres –depurados y ya oficials– de milars de toponimos analisaus per la Comisión Asesora de Toponimia d'Aragón a lo largo d'os zaguers anyos. Dende la suya constitución, en l'anyo 2016, esta Comisión, adscrita a lo Departamento de Vertebración d'o Territorio, Mobilidat y Vivienda se configura como un órgano colechiau de caracter consultivo pa la determinación d'os nombres cheograficos a incluyir en o Nomenclátor d'Aragón.
La Comisión ye presidida per lo consellero d'o citau Departamento, estando vicepresidentes los directors chenerals d'Ordinación d'o Territorio, Politica Lingüistica y Administración Local. Como vocals figuran lo director de l'Instituto Cheografico d'Aragón y representants d'a Universidat de Zaragoza, Instituto de Estudios Altoaragoneses, Instituto de Estudios Turolenses y Institución Fernando lo Catolico. Amás, cuenta, en este momento, con quatro expertos de reconoixiu prestigio.
Dica la calendata, la Comisión ha celebrau 29 sesions, a lo largo d'as qualas ha recuperau mas de 12.000 toponimos autoctonos de territorios que las suyas luengas propias son l'aragonés y lo catalán d'Aragón, contando en tot momento con as entidatz locals y atros achents territorials.
