Dimpués de 12 anyos d'ausencia, Mallacán tornó a los escenarios lo pasau 6 de chunyo en o Borina! Festa! Fest!, lo concierto solidario con AraInfo. A l'arreu d'esta actuación, anuncioron un concierto pa l'11 de chinero de 2025 en Zaragoza pa celebrar 30 anyos de mosica "con convidatas e convidatos especials" y d'o cual en os venients días irán desvelando més sospresas. En totas dos citas, las dentradas voloron. A partir d'astí, la banda aragonesa ha dau cualques actuacions en distintos municipios d'o país.
"Como sabez, estes meses han estau intensos pa nusatros. Dimpués de muitos anyos chirando y en proyectos paralelos volando enta nuevos universos sonoros, hemos tornau a tocar chuntos y, con a musica y as cancions, tamién muitas emocions. Una d'as alegrías més grans ha estau retrobar-nos con amigas y amigos de tot o mundo, personas con qui compartimos una visión d'a vida anque nos separe mils de kilometros", reconoixe Mallacán.
Agora, acaban d'anunciar lo lanzamiento d'una edición especial y limitada en vinilo de "Chera chera!", lo suyo segundo treballo que veyió la luz en abril de 2002. Este lanzamiento "tiene un significau especial": ye a primer vez que Mallacán edita un vinilo. Con unidaz limitadas y un nuevo disenyo de portada y contraportada a cargo de Nuei Produzions y Womba Estudio, a data de salida oficial será o 29 de noviembre.
La propuesta plegaba dende Holger, "o nuestro chirmán d'Alemania, qui compartió con nusatros a nuestra primera chira per Europa". "Chunto a o colectivo Lucha Amada, nos proposó de reeditar o nuestro segundo disco en vinilo. Kasba Music se sumó a o proyecto. Dimpués de més d'un anyo de treballo, finalment podemos anunciar a reedición en vinilo de 'Chera, chera!".
Debiu a esta edición limitada, la banda ha habilitau un formulario de reserva pa Aragón, con envío a domicilio "d'a man d'a nuestra familia de La Veloz Ecomensajería" u bien pa recullir-la en o suyo local en Zaragoza. Estas unidaz serán numeradas y firmadas per a banda. Mallacán, resiste, resiste: que no s'amorte a flama.
