La revista ‘El Ebro, revista aragonesa de pensamiento’ editada per la Fundación Gaspar Torrente, con a cuala colabora la Deputación de Zaragoza, dedica lo suyo numero 18 “a las claus d'o supremacismo lingüistico”. Y ha estau presentada per lo deputau de Archivos y Bibliotecas d'a Deputación de Zaragoza, José Manuel Latorre, lo president d'a Fundación Gaspar Torrente, Bizén Fuster, y lo coordinador d'este numero, Ignacio López Susín.
“Dimpués d'a publicación d'o numero especial 16-17, dedicau monograficament a la figura de Eloy Fernández Clemente, lo conteniu d'este nuevo numero se corresponde en buena parte con as ponencias presentadas en a chornada ‘Las claus d'o supremacismo lingüistico’, celebrada en a DPZ lo 21 de febrero con motivo d'a commemoración d'o Día Internacional d'a Luenga Materna”, ha explicau Latorre.
Entre los autors, figuran Juan Carlos Moreno Caberra, catedrático de Lingüistica d'a Universidat Autonoma de Madrid, José Ignacio López Susín, exdirector cheneral de Politica Lingüistica d'a DGA y patrono d'a Fundación Gaspar Torrente y Ramón d’Andrés Díaz, profesor de Filolochía d'a Universidat d'Uviéu y miembro de l'Academia d'a Luenga Asturiana. Pero tamién las loas y discurso d'acceptación d’o I Premio Eloy Fernández Clemente (Chulia Ara, José Ignacio López Susín y Francho Nagore), y belatro treballo complementario.
Latorre ha recordau que “tanto la publicación d'a revista ‘El Ebro’ como la chornada celebrada lo 21 de febrero forman parte d'as actividaz levadas a cabo en o marco d'o programa de colaboración entre la Deputación de Zaragoza, a traviés d'a Delegación de Archivos y Bibliotecas, y la Fundación Gaspar Torrente, totas con gran exito de participación”.
Amás, s'ha referiu a unatra d'as actividaz celebradas, lo I Curso d'Historia, Cultura y Identidat d'Aragón, que la suya clausura tenió lugar lo pasau 24 d'octubre, y d'o cual destaca que “ha constado de 20 sesions entre febrero y octubre y la inscripción ha estau gratuita, gracias a la colaboración d'a Fundación Gaspar Torrente, la Deputación de Zaragoza, la Universidat de Zaragoza y la Fundación d'a Caixa Rural. Ha contau con mas de 500 inscritos (130 presencials y 375 que l'han seguiu on line)”, ha anyadiu.
Per la suya parte, Fuster ha explicau que “l'obchectivo yera que los asistents conoixesen millor Aragón y meter los alacez pa dispertar en éls l'interés per totas ixas materias que determinan lo ser d'Aragón, per ixo s'han tratau con os millors especialistas materias como la Historia, dreito foral, luengas, literatura, antropolochía, folklore, arte, cine, mosica, economía, aragonesismo, personalidaz relevants, mesmo lo papel d'os clubs esportivos de élite”.
“Hemos teniu lo placer de contar con catedráticos d'a talla de Julián Casanova, Carmen Bayod, José Luis Corral, Pilar Utrilla, Gregorio Colás, Carmen Morte u Vicente Pinilla, y especialistas en as suyas diferents materias como Domingo Buesa, Antonio Pérez Lasheras, Vicky Calavia, José Luis Melero, Antonio Peiró, Carmen Gallego, Francho Nagore, Pilar Benítez, Ángel Sancho, María Pilar Mas u Antón Castro”, ha sinyalau Fuster.
Finalment, lo president d'a Fundación Gaspar Torrente ha animau a participar los proximos 6 y 7 de noviembre en as ‘XIX Chornadas sobre lo Modelo d'Estau’ con o “financiamiento autonomico y lo inconcluso modelo territorial como tematica prencipal. La conchuntura politica actual, con a polarización social, lo papel d'os nacionalismos perifericos y la división u fractura social existent fan especialment oportuna la celebración d'as chornadas buscando claus y consensos que permitan abanzar”, ha finalizau.
Per la suya parte, José Ignacio López Susín, coordinador d'o zaguer numero, ha agradeixiu a José Manuel Latorre “lo compromiso d'a Deputación de Zaragoza con a cultura y las luengas propias d'Aragón”. Amás, ha explicau que los prencipals temas que s'han tratau son “la definición d'o supremacismo lingüistico como la creyencia que i hai luengas que son superiors a atras, la ignorancia d'a ciencia lingüistica en favor d'a opinión que tienen d'as suyas propias luengas los hablantes que no son linguistas ni filologos, y la falacia de clamar común a lo que nomás ye castellán”.
