Esta publicación replega los treballos d'investigación que estioron presentaus en a chornada celebrada en Calamocha lo 30 de setiembre de 2023. En ella presentoron los suyos treballos una veintena d'estudiosos y estudiosas d'o lexico aragonés conservau en a zona meridional d'Aragón y asistioron mas de 80 personas.
Lo libro colectivo incluye “la conferencia inaugural d'o profesor José María de Jaime Lorén sobre ‘Los trabajos de recopilación de léxico aragonés en el valle del Jiloca. Una panorámica’ y s'estructura en tres seccions”, explican dende lo Centro d’Estudios d'o Xiloca.
La primera d'ellas se centra en a historia d'a luenga aragonesa, con especial mención a la suya presencia en as comarcas meridionals aragonesas y con un estudeyo d'o lexico profesional metalurchico. La segunda sección describe iniciativas ciudadanas pa replegar y difundir lo lexico de l'idioma aragonés que encara pervive en o sud d'Aragón, en particular, en o Baixo Aragón y en a val d'o Aguasvivas. La tercera sección, que ye lo cuerpo d'a publicación, incluye los treballos de recopilación de vocabulario d'as localidaz de Alacón, Aliaga, Balconchán, Bañón, Calomarde, Celadas, Escucha, Gallocanta, Guadalaviar, Palomar de Arroyos, Pancrudo, Tarazona y Villar d'o Salz.
Finalizan as actas con una selección de poemas d'os escritors Chusé Carlos Laínez, Carmen Soguero Pamplona y Andrés Castro, toz éls vinculaus a las comarcas d'o sud d'o país.
La edición, en formato dichital y en papel, ha estau realizada per lo Centro d'Estudios d'o Xiloca. Pa las personas intresadas lo pre de venda d'os eixemplars fisicos ye de 20 euros.
