Lo prochecto europeu Matilde presenta en Samianigo lo suyo treballo d'avaluación d'as aportacions d'as personas inmigrantes a lo desembolique de zonas rurals y de montanya d'o Viello Continente, y la suya integración en estes territorios. Lo profesor de Cheografía d'o Campus de Uesca de Unizar Raúl Lardiés, que coordina en Aragón esta iniciativa, imparte una conferencia este viernes, 19 de chinero, en a capital de l'Alto Galligo. Precisament esta comarca y la de Os Monegros han estau los puestos an s'ha realizau lo treballo de campo d'este estudeyo en o nuestro país. La charrada, organizada per la universidat publica aragonesa y la siede d'a UNED en esta localidat, tendrá lugar, a partir d'as 19.00 horas en l'edificio Pirenarium. A partir d'ixe momento, y dica lo 26 de chinero, podrá visitar-se en este mesmo lugar, de luns a viernes, de 9 a 14 y de 17 a 20 horas una exposición sobre este prochecto present en diez países europeus.
Matilde (Migration Impact Assessment to Enhance Integration and Local Development In European Rural And Mountain Areas) analisa, dende lo suyo comienzo fa cuatro anyos, lo impacto que la immigración d'orichen forano y extracomunitaria tiene en a cohesión territorial y en o desembolique local en as rechions rurals y montanyosas. Con este prochecto, que se ye implementando en un total de trece rechions, territorios u comarcas d'Italia, Inglaterra, Suecia, Turquía, Alemanya, Finlandia, Austria, Noruega y Aragón “se pretende amillorar la integración y la contribución d'estas personas en estes territorios marguinaus”, sinyalan dende lo prochecto. Pa ixo se son elaborando propuestas d'actuación con a finalidat d'amillorar las formas de vida d'a población local y la migrant y lo suyo asentamiento en os distintos territorios. La Universidat de Zaragoza, con a colaboración d'o Gubierno d'Aragón, ye la responsable d'esta iniciativa en o Estau espanyol.
