Lo estudeyo y la practica de l'idioma aragonés a traviés d'a mosica ye l'obchectivo d'a zaguera publicación d'a cátedra Johan Ferrández d'Heredia -empentada per lo Gubierno d'Aragón y la Universidat de Zaragoza- que recopila mas de 70 cancions en luenga aragonesa. Lo director cheneral de Politica Lingüistica d'o Gubierno d'Aragón, José Ignacio López Susín, presentaba este pasau mierques a las 19.30 horas en o Paraninfo d'a Universidat de Zaragoza esta obra, que contribuye “a la difusión d'o patrimonio lingüistico d'Aragón y a l'aprendizache d'as suyas luengas propias”.
Entre lo listau de cancions incluyidas en o florilegio, s'incluyen tanto belunas con textos en bella d'as diferents variedatz locals de l'aragonés y atras componidas en o clamau aragonés literario u común. D'esta traza, se pueden trobar temas como ‘Baxando t’a escuela’, d'a Ronda de Boltaña, pero tamién atras d'o repertorio popular, tals como ‘O corroncho d’a patata’, ‘En dó son as claus’ u ‘ Estaba/Yera o siñor don Gato’.
Cada dentrada individual contiene la letra d'a canción y una ficha u quadro resumen an se detalla, en os casos en os quals ha estau posible, información concernient a la procedencia, variedat d'aragonés, titol, autoría, bibliografía, fuents y vinclos a internet en os quals se puede escuitar la canción, complementau en ocasions con codigos QR.
Este volumen, elaborau per las expertas en patrimonio musical Ana Isabel Serrano y Roberto Anadón, pretende servir como ferramienta de consulta que facilite lo posterior uso pedagochico d'a suya información. La canción, afirman los expertos, puede servir de material encorachador pa convidar a la participación activa d'o alumnado.
Per unatro costau, esta publicación sienta las bases pa que se pueda construyir una compilación integral que contienga, amás, las partituras musicals y videos u audios con a suya interpretación.
