Lo cortometraje animau sobre la biografía de Goya, disponible en aragonés

‘Me puetz clamar Goya, Francho Goya’ ye un recurso didactico endrezau a lo alumnado d'Educación Primaria

Fotograma d'o curto 'Me puetz clamar Goya, Francho Goya'.

La Dirección Cheneral de Politica Lingüistica d'o Gubierno d'Aragón ha adaptau a l'aragonés lo cortometraje animau 'Me puetz clamar Goya, Francho Goya', produciu per la Fundación Goya en Aragón con motivo d'o 275 aniversario d'a naixencia d'o pintor de Fuent de Todos. L'obchectivo d'esta pieza audiovisual de ueito menutos ye que las y los escolars conoixcan la suya biografía y aprendan a valorar, d'una forma amena y divertida, lo rico legado artistico de l'artista, agora tamién en aragonés.

A modo de storytelling, un Goya en primera persona explica totz los contenius (contexto historico, artistico, cultural, las suyas obras...) combinando una atmosfera dibuixada con a presentación d'obras pictoricas reals. Un recurso didactico muito atractivo visualment pa las y los mas chicotz, con audio, video y subtitulado en aragonés.

Lo video describe, dentro de l'ambito educativo y familiar, quí estió Francisco de Goya, quán vivió, las suyas aportacions a lo mundo d'a pintura y las tecnicas que utilizó: olios, pinturas a lo fresco, cartones pa tapices y lo gravau. Amás, se fa referencia a los suyos viaches, obras mas importants, legado artistico y tamién qualques curiosidatz.

En definitiva, "se tracta de dispertar la curiosidat d'o alumnado per lo personache de Goya y que aprendan a identificar qualques d'as suyas obras, asinas como las diferents tecnicas artisticas que utilizó", explica dende Politica Lingüistica. Amás, "este formato permite que las y los escolars faigan partícipes a las suyas familias d'os contenius abordaus, afavorindo que chuntos s'intresen per la vida de Francisco de Goya y puedan animar-se a visitar los museos, salas u monumentos an se conserva la suya obra".

Lo cortometraje ye ilustrau per l'artista aragonés David Guirao y presienta un recorriu cronolochico locutado (y subtitulado) en primera persona per l'actor Félix Martín, d'o Teatro d'o Temple, utilizando como prencipal filo narrativo las pinturas de Goya, las suyas cartones y la suya colección de gravaus. "D'este modo, s'aduya a que los ninos y ninas asimilen millor los contenius", anyade Politica Lingüistica.

Audiovisuals pa la difusión d'as luengas d'Aragón

Per unatro costau, la Dirección Cheneral de Politica Lingüistica ha feito una apuesta per la utilización d'os audiovisuals pa la difusión d'as luengas propias d'Aragón, y en ixe sentiu ha enguerau ya la serie de dibuixos animaus 'Moñacos', pa aprender nocions basicas d'aragonés, y proximament enguerará unatra serie de marionetas endrezada a lo publico infantil.

Amás, se ye ultimando una serie tematica sobre diversos aspectos d'as luengas propias endrezada per Vicky Calavia; un documental sobre lo "Vidal Mayor", endrezau per Isabel Soria; unatro sobre la ópera 'Martina' en aragonés ribagorzano, d'Aurelio Bardaxí, y quantos videoclips musicals de Biella Nuei.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de nuestra política de cookies, pincha el enlace para más información.

ACEPTAR
Aviso de cookies