La cultura popular d'as vals d’Ordesa protagoniza quatro nuevos videos de Biella Nuei

La colla musical y la vecindat de Broto, Vio, Puértolas-Tella y Bielsa protagonizan estas piezas musicals. Este sabado s'enguera lo primero d'ells, ‘Ronda en Buesa’, en a canal oficial d'a Deputación Cheneral d'Aragón dedicau a las luengas propias -aragonés y catalán-.

nuevos videos de Biella Nuei

Buesa ye un lugar encantador en a Val de Broto “an gravamos esta ronda con coplas tradicionals en aragonés. Amás d'un famoso restaurant, en Buesa viven qualques buens amigos: José de Casa Alonso y Marino de Casa Cleto, viellos pastors que nos aduyoron en a nuestra investigación. Tamién Javier Estella, d'a productora Nanuk que gravó lo videoclip, proviene de Casa Zirasuala de Buesa. Asinas que, dimpués de dos anyos d'isolamiento, tot y que la pandemia yera encara muito cerca, levar un poquet de mosica y goyo a este y atros chicotz lugarons an hebanos gravau yera lo millor que podebanos fer. Yeranos pocos pero lo pasamos en gran. Entalto Buesa y a Val de Broto!”, destacan dende Biella Nuei.

Pa lo director cheneral de Politica Lingüistica d'a Deputación Cheneral d'Aragón, José Ignacio López Susín, “lo treballo de Biella Nuei ye fundamental pa recuperar y dar a conoixer la mosica y la cultura d'os municipios que integran lo Parque d’Ordesa, asinas como la luenga aragonesa que allí se conserva”.

Asinas, la canal de videos de la Direccion Cheneral de Politica Lingüistica d'o Gubierno d'Aragón, Luengas d'Aragón, incorpora a la suya videoteca quatro nuevos videoclips en aragonés d'o grupo musical Biella Nuei “centraus en a cultura popular y la luenga d'as vals d'o Parque d’Ordesa y Mont Perdiu -u d'as Tres Serols-. Este treballo s'enmarca en ‘Ordesa, l'arbol volador’, la nueva obra musical de Biella Nuei”.

Lo treballo que agora se presienta lo componen quatro nuevos videos en aragonés y subtitulados en esta luenga: ‘Ronda en Buesa’, que s'enguera este sabado en a canal de video Luengas d'Aragón, ‘Romanze de Marichuana’, ‘Ronda en Espierba’ y ‘Danza d’as bruixas’, que serán disponibles en as proximas semanas.

Ronda en Buesa se gravó en este chicot lugar d'a Val de Broto -u Vallibroto- como una ronda tradicional y en ell colaboró la vecindat aportando coplas y ubrindo las suyas casas pa convidar a minchar y beber. Luis Miguel Bajén explica que “estió un momento muito emocionant pa totz, perque se gravó poco dimpués d'as restriccions per la pandemia y los pocos habitants que viven entre tot l'anyo acullioron la mosica y lo goyo d'a ronda como augua de mayo. Amás, entre la ronda faciemos un homenache a dos d'os vecins que nos aduyoron en o nuestro treballo d'investigación: José Felices, de Casa Alonso, y Marino Luis Rabal, de Casa Cleto, viellos pastors que nos recordoron la dura vida que levaban entre la trashumancia a la tierra baixa”. Lo video estió preestrenado en Buesa recientment en un acto muito emotivo.

‘Ordesa, l'arbol volador’ ye la retrobada d'a chent d'os Pirineus con a suya mosica y la suya cultura. Dimpués de quantos anyos investigando la cultura popular d'as vals del Parque d’Ordesa (Broto, Vio, Puértolas-Tella y Bielsa), con a colaboración de muitos d'os suyos vecins y vecinas, lo grupo les torna las viellas melodías renovadas en as suyas voces y trastes. En total, son dotze videoclips gravaus en chicotz lugars a lo largo d'os dos zaguers anyos, muitos d'ells con a colaboración d'hombres, mullers, ninos y ninas d'estas vals que han convertiu estas gravacions en un verdadero escayecimiento festivo.

La reconoixencia y valor d'o tesoro cultural d'o Pirineu aragonés, la suya mosica y la suya luenga, tantas vegadas maltratadas, se convierten en orgullo, enerchía y motor pa recuperar la vida en estas montanyas. Pa Luis Miguel Bajén, de Biella Nuei, “ye una gritada d'atención a un patrimonio que cal revitalizar y nuestro emparo musical a los ‘Roldes de Resistenzia Rural’ de tot lo país, los lugars que se resisten a la emigración y l'abandono”.

“La mosica tradicional d'as vals d’Ordesa ye, encara que muito desconoixida, una d'as grans alfayas d'a cultura pirenenca, con trastes tant peculiars como la gaita de boto aragonesa u estilos como lo canto ‘a son de gaita’. Tamién conserva cheneros d'antiga raigambre como albadas, pasavillas, romances, provechos, palotiaus u cascabillos”, destacan dende la DGA.

En os distintos videos participan Inma Carné (voz y castañetas), Eduardo García (acordión), Jorge Álvarez (gaita de boto, flautas, albogue, pandereta), Ernesto Cossío (guitarra), Jorge Casasnovas (guitarra), Pilar Almalé (viola da gamba y voz) y Luis Miguel Bajén (voz, flautas, dulzaina, percusión).

Igual que los anteriors treballos d'este prochecto, los videos han estau endrezaus per Javier Estella y José Manuel Fandos de Nanuk Produccions Audiovisuals y forman parte d'un treballo d'investigación que ha dau forma, tamién, a lo libro ilustrau ‘Ordesa, naturaleza y cultura popular” de Luis Miguel Bajén y Chema Agustín.

Audiovisuals pa la difusión d'as luengas d'Aragón

Per unatro costau, la Direccion Cheneral de Politica Lingüistica recuerda la suya “apuesta decidida per la utilización d'os audiovisuals pa la difusión d'as luengas propias d'Aragón -aragonés y catalán-, y en ixe sentiu ha enguerau ya la serie de dibuixos animaus ‘Moñacos’, pa aprender nocions basicas d'aragonés, y proximament enguerará unatra serie de marionetas endrezada a lo publico infantil. Amás, se ye ultimando una serie tematica sobre diversos aspectos d'as luengas propias endrezada per Vicky Calavia, un documental sobre lo “Vidal Mayor”, endrezau per Isabel Soria; unatro sobre la ópera ‘Martina’ en aragonés ribagorzano, d'Aurelio Bardaxí, y proximament s'enguerará la traducción a l'aragonés d'un curto sobre Francho Goya”.

La canal de videos Luengas d'Aragón, lo componen ya mas de 400 videos de difusión de l'aragonés y lo catalán d'Aragón con 1.200 suscripcions y 150.000 visualizacions.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de nuestra política de cookies, pincha el enlace para más información.

ACEPTAR
Aviso de cookies