Durant las chornadas d’o viernes 17 y sabado 18, la seu d’a Comarca d'A Chacetania acullió las intervencions de quasi meyo centenar de ponents, autenticos referents en botanica, cheolochía, ganadería, dreito, arqueolochía, montanyismo, climatolochía, guías de montaña y atras disciplinas venidas de diferents rincóns d’a cordillera pirenaica en as suyas dos vertients.
Istas personas expertas abordoron, debant d’un salón d’actos pleno a rebutir con mas de 200 personas inscritas (tota la capacidat d’a sala), la situación d’o Pirineo y lo caso paradigmatico d’a protección d’a Canal Roya, esgranando las valors d’a naturaleza y biodiversidat d’o tesoro natural d’a Canal Roya, los efectos socioeconomicos d’a suya protección, las posibles figuras d’ixa protección u las interaccions con a ganadería, lo montanyismo u lo cambio climatico.
Iste Congreso ha estau posible gracias a una organización formada por un comité tecnico integrau por personas d’o sector scientifico, tecnico, churidico, ambiental y residents en o Pirineo, asinas como a un equipo de quantas decenas de personas voluntarias que, chunto con l’apoyo d’as organizacions promotoras y quasi meyo centenar d’entidatz colaboradoras, han feito posible iste gran evento.
Tot ixo ha significau que iste Congreso Pirenaico d’a Canal Roya haya estau un rotundo exito tanto por los numeros en a participación como por la impresionant calidat d’os contenius y las intervencions d’os diferents ponents durant las tres chornadas.
Un exito que ye un fiel reflexo d’o que significa la Canal Roya: un autentico referent en os paisaches de montaña y tota una sinyal d’identidat ta la sociedat aragonesa, pero tamién, como s’ha visto en iste acontecimiento, de personas muito mas allá d’as nuestras fronteras. Una sinyal identitaria aragonesa con caracter universal que mereixe y precisa estar protechida.
“Lo zierre d’o Congreso simplament ye un punto y seguiu. En os proximos días tota la documentación chenerada, los videos d’as ponencias y las comunicacions recibidas, asinas como lo documento de conclusions, serán elaborados y feitos publicos y colgaus en a web d’o Congreso”, destacan dende la organización.
Asinasmesmo, “se fará plegar ixe documento de conclusions a las administracions competents ta que cumplan con la suya parti y faigan efectiva la protección definitiva, d’una vez, d’ista sinyal d’identidat d’a montaña y la sociedat aragonesa y pirenaica: la Canal Roya”, enfatizan ta concluyir dende la organización d’o congreso.
