Lo comité organizador ha anunciau que ya ha completau lo programa “tanto per lo que fa a temas a abordar como a los ponentes que los desenvolverán”, d'o congreso que se celebrará d'o 17 a lo 19 d'abril en a siede d'a Comarca d'A Chacetania en a ciudat de Chaca. Acullirá conferencias y mesas de ponencias “sobre las valors d'a naturaleza y biodiversidat de la Canal Roya, los efectos socioeconomicos d'a suya protección, las posibles figuras d'ixa protección u las interaccions con a ganadería, lo montanyismo u lo cambio climatico”.
Lo domingo 19 d'abril se realizará una visita guiada a la Canal Roya d'a man de diferents educadoras ambientals y guías de montanya. Lo programa completo ya ye disponible en a web d'o congreso.
“Toz estes temas van a estar desenvueltos per cuasi meyo centenar de personas expertas y de renombre en as diferents materias. Prencipiando per tot un Eduardo Martínez de Pisón que ubrirá con a conferencia inaugural pa dar paso entre lo cabo de semana a personas referents en botanica, cheolochía, ganadería, churistas, arqueolochía, montanyismo, climatolochía, guías de montanya, etc., venidas de diferents rincones d'a cordillera pirenaica en as suyas dos vesants”, subrayan dende la organización.
Asinasmesmo, recalcan que “dau que son muitas las personas que son autenticos referents” nacionals, estatals y mesmo internacionals en as suyas materias “preferimos no citar simplement a unas pocas, antiparte d'o lo mencionau ponente inaugural. Y per ixo tamién agradeixer la presencia incondicional de totas ellas -lista completa de ponentes con una chicota bio-, que ye una muestra d'a importancia, valor y cariño que dispierta este icónico enclave pirenaico aragonés de la Canal Roya”.
“A lo mesmo tiempo, lo ritmo d'inscripcions a lo congreso no deixa de creixer y ya s'ha superau lo centenar de personas inscritas encara que quedan plazas libres”, detallan, y recuerdan que las inscripcions se pueden formalizar en este vinclo.
Finalment, recuerdan que “lo Congreso Pirenaico Canal Roya ye organizau per un comité tecnico integrau per personas d'o sector cientifico, tecnico, churidico, ambiental y residents en o Pirineu, contando amás con tota una serie d'organizacions que lo promueven y una lista d'entidaz colaboradoras que se van unindo pa asegurar l'exito d'o mesmo”.
