L'Asociación Naturalista d'Aragón (ANSAR) y Ecolochistas en Acción Zaragoza (EeA-ZGZ), con l'emparo d'a Plataforma Salvemos os Pinars de Venecia “debant d'as declaracions de l'alcaldesa de Zaragoza, Natalia Chueca, en as cualas a la mesma vegada que anunciaba nuevas plantacions en a ciudat, tildaba de demagogos a quienes denunciaban la situación d'o arbolado en a nuestra ciudat”, quieren aclarir que “i hai feitos y datos que corroboran la falta de cudiau d'o arbolado existent en esta ciudat”.
Pa ditas organizacions, la manifestación d'o pasau 24 d'octubre, coincidindo con o Día Internacional de la Luita contra lo Cambio Climatico, contrimostró “que i hai cientos de ciudadans y ciudadanas preocupadas, que amostroron lo que veyen día a día y denunciaban la tala contina d'árbols en carreras d'a nuestra ciudat”.
“L'incomplimiento permanent d'a Ordenanza Municipal de Protección d'o Arbolado Urbano, las podas agresivas que desestabilizan los árbols y les provocan feridas irrecuperables, los milars de alcorques vuedos y una renovación de carreras que en cuenta de protecher lo arbolado maduro existent, los talan en a suya mayor parte, con a chustificación que se plantarán atros nuevos que manimenos, tardarán muitos anyos en producir uembra”, son motivos pa la preocupación seguntes o pareixer de totas dos entidaz.
ANSAR y EeA-ZGZ emparan “l'anuncio que l'alcaldesa ha feito de que van a plantar 2.000 árbols”, pero no comparten “la esleción d'especies que siguen estando en a suya mayoría exoticas de tot y con os requerimientos reiteradament realizaus, y mesmo belunas no recomendadas en a propia Ordenanza Municipal de Protección d'o Arbolado Urbano u desaconselladas per lo Gubierno d'Aragón per considerar-las como periglosas per lo suyo posible efecto invasor, como ye l'eixemplo d'a Gleditsia triacanthos u la Robinia pseudoacacia”. Per unatro costau recuerdan que “i hai mas de 8.000 alcorques vuedos, seguntes datos rechistraus en a propia aplicación municipal que no se cubrirán con os 2.000 árbols anunciaus ni se resolverá la gran ausencia de arbolado en muitas d'as carreras d'os nuestros vicos”.
Pero amás d'a esleción d'especies, contrarias a la naturalización d'a ciudat, lo que mas preocupa a ditas organizacions ye “lo maltrato que reciben los árbols existents, árbols que han tardau en conseguir lo porte y la uembra que alivian d'as altas temperaturas en verano, contribuyindo a la salut d'as personas”. Cada vegada que se renueva una carrera o un parque u se fa una obra “no se realiza con o cudiau necesario pa la protección d'os árbols ubicaus en l'entorno, tal como indica la Ordenanza Municipal de Protección d'o Arbolado Urbano: ‘cuan se realicen obras publicas u privadas que puedan afectar a lo arbolado, bien per la propia execución d'os treballos u per lo tránsito de maquinaria y vehíclos arredol d'un árbol, s'habrán d'adoptar las medidas de protección necesarias pa evitar daños en o tronco, radices y ramas’, indica la Ordenanza”, enfatizan dende las entidaz ecolochistas.
“Este ye lo caso, en estes momentos, d'a carrera Manuel Lasala, paralela a lo río Huerva, en a cuala se son devantando las aceras sin garra protección a lo arbolado allí existent, ixo ocasionará danyo a las radices, a la desestabilización d'os árbols y como en atras ocasions los podrá tornar inseguros con o que rematarán estando picaus y talaus”, feito per lo cual, anuncian que van a presentar “una denuncia” a lo Concello de Zaragoza.
Los colectivos denunciantes, le requieren a l'alcaldesa Chueca “y a tot lo suyo equipo de gubierno, que ye important aumentar lo arbolado d'esta ciudat pero a la mesma vegada fer-lo con as especies adecuadas y sobre tot conservar lo arbolado existent, tanto lo d'as nuestras carreras, plazas y parques como lo d'as selvas de ribera y pinars como los de Venecia, a los cuals dica lo momento no ha dedicau ni un euro en a suya revitalización”. Asinasmesmo le demandan “asumir unatra concepción d'a chardinería, en a cuala se disminuiga lo césped y se veiga substituyiu per herbáceas y macizos arbustivos que potencien la biodiversidat. Hue en día, este césped cuantiosament regau, en o cual s'ubican pinos y atras especies, ye provocando la malotía y caita d'os mesmos”, aseguran pa concluyir.
