A Trobada d’immersión lingüistica en aragonés celebra las diez edicions en a Val d’Echo

A trobada ye una iniciativa itinerant que se celebra dende 2014 y que recorre diferents lugars de l’Alto Aragón con una comunidat activa de fablants d’aragonés. A decena edición se organiza en a Val d’Echo, con actividatz repartidas entre os lugars d’Echo y Ciresa os días 25, 26 y 27 de noviembre de 2022.

Trobada d’immersión lingüistica

En edicions pasadas a Trobada ha vesitau os lugars de Fonz, Secastiella, Artieda, Yeste, Panticosa, O Pueyo de Chaca, Chistén y Sant Chuan de Plan. A decena edición se organiza en a Val d’Echo, con actividatz repartidas entre os lugars d’Echo y Ciresa os días 25, 26 y 27 de noviembre de 2022.

As fablants d’aragonés viven en una situación de minorización en do la luenga vehicular en a mayoría d’os espacios ye lo castellano, quedando l’aragonés amagau en ambients familiars y de confianza. A Trobada ye una ferramienta que mira d’ufrir espacios de raso en aragonés a la comunidat de charradors y charradoras, refirmando a idea de que a luenga se puede emplegar en totz os ambitos d’a vida y no nomás en os espacios privaus.

Trobada d’immersión lingüistica

A propuesta ye fer unas chornadas d'un cabo de semana en que l’aragonés siga la principal luenga de comunicación, fendo una immersión total en esta luenga. As personas participants d’a Trobada aprenden las unas d’as otras a charrar un millor aragonés fablando-lo entre ellas, en as clases, en as actividatz ludicas propuestas y fendo orella en as charradas cutianas. Se mira d’acudir a puestos en do se charra aragonés como luenga materna, con l’obchetivo d’achuntar a personas nativas con neofablants. Esta edición se fa en Echo y en Ciresa, dos lugars en os que se charra lo cheso, a variedat occidental de l’aragonés con mayor vitalidat.

O programa prencipia lo viernes 25 de noviembre en o cine d’Echo con una bienvenida por parti d’un grupo de personas locals d’Echo que leyerán bella muestra de literatura tradicional en aragonés cheso, contino lo sociologo Anchel Reyes fará una contextualización d’a situación social de l’aragonés en a comarca d’a Chacetania y se prochectará o documental “Voces en o Cierzo / Veus en el cerç” sobre a literatura escrita por mullers en Aragón en catalán y aragonés produciu por Vicky Calavia.

Trobada d’immersión lingüistica

Lo sabado 26 de maitins se fará una vesita cultural por Ciresa guiada por una guía local d’a iniciativa Historias del Pirineo y una clase d’aragonés cheso con o Doctor en filolochía Fernando Romanos. De tardis ye programada una presentación en Echo de l’Academia Aragonesa de la Lengua y una sesión participativa de chuegos tradicionals chunto con a Peña Zaragocista Val d’Echo. De nueits se tornará ta Ciresa pa disfrutar d’un concierto con o grupo Crebazando Muros y zarraremos la nueit con o uescano DJ Bruixón.

Pa rematar, lo domingo 27 se faran dos actividatz paralelas: qui quiera podrá participar en la gambadeta contra la violencia masclista que organiza la asociación de mullers de la Val d’Echo por o #25N y qui s’estime más de no de fer a marcha, tendrá la opción de participar en una vesita guiada por Echo con a iniciativa Historias del Pirineo.

Os actos son libres y de baldes pa tot o mundo, pero pa solicitar aloixo en l’albergue de Ciresa y reservar chentas y cenas cal apuntar-se antis d’o 20 de noviembre en o siguiente enlaz.

Pa mas información d’a Trobada podetz vesitar o twitter de l’asociación u la suya pachina de facebook.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de nuestra política de cookies, pincha el enlace para más información.

ACEPTAR
Aviso de cookies