Han estau 1126 "síes" frent a 561 "noes" y 14 votos "me resulta indiferent". Este ye lo resultau de la consulta ciudadana que lanzó lo Concello de Zaragoza pa incluyir la jota "S'ha feito de nuey" en l'acto d'o pregón d'as Fiestas d'o Pilar precedendo a lo "Canto a la Libertat" de José Antonio Labordeta.
Entre lo 21 de setiembre y l'1 d'octubre, la ciudadanía que lo deseyase habió de responder a una sencilla pregunta sobre si yeran u no d'alcuerdo con asentar "S'ha feito de nuey" como prolegómeno d'o "Canto a la Libertat" de Labordeta. Entre los diez días en os cuals estió ubierto lo proceso participativo votoron 1701 personas. Dos de cada tres personas (66%) votoron afirmativament.
D'esta traza, la canción que componió en aragonés, variedat chesa, lo compositor d'Echo Pepe Lera, se reproducirá en playback y la letra podrá seguir-se en as pantallas d'a Plaza d'o Pilar, "con o deseyo que la ciudadanía la cante de traza coral", explica lo Consistorio.
Dimpués d'a buena acullida que tenió lo "S'ha feito de nuey" entre lo pregón de 2022, que entonaron dende lo balcón consistorial los representants d'a jota como pregoneros, lo Concello de Zaragoza plantió un proceso participativo pa afianzar esta canción tradicional entre l'acto que da inicio a las fiestas.
Manimenos, no deixa de sosprender que haiga estau el mesmo Concello PP-Vox lo que haiga lanzau esta consulta cuan viene despreciando sistematicament a la luenga aragonesa. Amás, cal recordar que ya intentoron, sin exito, eliminar d'as fiestas tanto lo "Canto a la Libertat", en o ranque, como lo "Somos", en o remate.
Mas información sobre los Pilars 2023 en este vinclo.
