Mas de 150 personas se reunirán en Salamanca con a tematica de l'augua sobre la mesa, en una trobada internacional organizada per l'aragonesa Fundación Nueva Cultura del Agua (FNCA). Lo XIII Congreso Iberico de chestión y planificación de l'augua, que se celebra entre lo 24 y 26 d'abril con un interesant programa y una lista de prestichiosas ponents, “chirará arredol d'a transición hidrica chusta, una perspectiva dreitament vinculada a la transición hidrica agraria y a lo reparto social de l'augua”, sinyalan dende la organización. “La reducción de risgos debant d'inundacions y sequeras, cuestión muito d'actualidat, amás d'a interdependencia entre los socioecosistemas hidricos y agrarios tendrán gran peso en la fita que alberga lo Colechio Fonseca d'a Universidat de Salamanca”, detallan.
Lo congreso será dividiu en cuatro arias tematicas, per las cualas pasarán figuras provenientes tanto de l'ambito academico como social, que debatirán baixo lo lema ‘Dende la escasez enta la reasignación social y ambiental de l'augua’. La devantadera ye prevista lo chueves 24 a las 9:00 horas d'o maitín, con o president d'a FNCA, Joan Corominas, amás de Dionisio Pérez y Javier Sierra, toz dos copresidentes d'o Comité organizador. Tamién asistirán lo vicerrector d'Investigación d'a Universidat de Salamanca, José Miguel Mateos, y la directora de l'Instituto madrilenyo de Estudios Abanzaus (IMDEA-Augua), Irene de Bustamante.
La XIII edición abordará de forma especial “lo retroceso sufierto en as politicas ambientals europeas”, en parolas de Julia Martínez, directora tecnica d'a FNCA. La primera d'as plenarias, dedicada a los ‘Desafíos en o ciclo urbano de l'augua debant d'o cambio climatico’, amprará especial atención a cuestions como lo dreito humano a l'augua y a lo saniamiento, la chestión d'a sequera y la escasez, las afeccions d'o sector turistico y las solucions basadas en a naturaleza. Jaime Melo, d'o Centro Internacional da Água de Lisboa, Aura Vidal, de Enginyeria Sense Fronteres, y Milo Fiasconaro, de Aqua Publica Europea, serán las encargadas de debatir entre lo maitín d'o chueves.
La tarde ye reservada pa l'eixe ‘Augua y agricultura. Dialogos sobre la interdependencia entre sociosistemas hidricos y agrarios’. Luis Berraquero, de Greenpeace, Noelia Márquez, de COAG Andalucía, y Francesc La Roca, d'a FNCA, charrarán arredol d'o peso d'as actividaz agrarias en l'uso y lo consumo d'augua, tanto en termins cuantitativos como cualitativos. Como linias transversals d'a chornada, los nexos que vinculan l'augua con os alimentos, la enerchía y los ecosistemas. “No i hai contraposición entre os intereses d'os agricultors y los d'a resta d'a sociedat. Los productors son los mas intresaus en que i haiga bella chestión diferent de l'augua”, ha asegurau la directora tecnica d'a FNCA.
Paisaches de l'augua
L'achenda d'o viernes s'ubrirá con ‘Paisaches de l'augua. La inaplazable asignatura pendient’, que discutirá conceptos como los de restauración, estau ecolochico, conservación, continuidat fluvial, especies exoticas y servicios ecosistémicos. Esta sesión será a cargo d'Alfredo Ollero, d'a Universidat de Zaragoza, Xavier Quintana, d'a Universidat de Girona, y Maria João Feio, d'a Universidade de Coimbra.
Per la tarde, la cuarta y zaguera d'as conferencias, será titulada como ‘Gobernanza abanzada de l'augua en tiempos de escasez’. Per ella pasarán Ernesto Ganuza, de l'Instituto de Politicas y Bienes Publicos – CSI, Josefina Maestu, d'a Universidat d'Alcalá d'Henares, y Jorge Cardoso, d'a Associação Portuguesa dos Recursos Hidricos. Un espacio reservau pa revisar y debatir los aciertos y as carencias en materia de transparencia, asinas como en a creyación d'espacios participativos. Tamién s'abordará lo papel d'os movimientos socials y la importancia d'os conflictos hidricos.
Amplia participación
Los espacios repartius entre las cuatro plenarias serán cubiertos per mas de 160 investigacions arredol d'a problematica de l'augua dende perspectivas tanto academicas como socials.
Lo sabado per lo maitín ye reservau pa dos visitas de campo, la primera d'ellas a los aguazales de Joaquín Araujo, en concreto, a lo Centro d'Iniciativas Ambientals d'a Fundación Tormes-EB. Y una segunda opción paseará per la Salamanca mas historica y cultural.
La FNCA, que organiza estes congresos cada dos anyos, ye formada per profesionals procedents de diferents ambitos (academico, empresarial, cultural, social...), tanto d'Aragón, como d'os estaus espanyol y portugués , que promueven “un cambio en a politica de chestión d'auguas pa aconseguir actuacions mas racionals y sostenibles”. Esta fundación treballa “pa recuperar los ecosistemas acuaticos (fuents, ríos, riberas, lagos, humedales...), que son la maxima expresión d'a vida en a planeta” y desfiende tamién “la recuperación d'a valor patrimonial, cultural, emocional, estetico y ludico d'os ríos ibericos, en una sociedat que ha confundido progreso con negocio”.
Per la suya parte, tanto la Universidat de Salamanca como l'Instituto madrilenyo de Estudios Abanzaus (IMDEA) tamién han participau en a organización d'este XIII Congreso Iberico de chestión y planificación de l'Augua, y destacan, pa concluyir que “s'otorgará un premio de 1.500 euros a la millor comunicación choven”.
