Lo movimiento Vivienda Digna d'o Pirineu ha remitido a los partius politicos que concorren a las eslecions aragonesas d'o 8 de febrero un documento con propuestas concretas en materia de vivienda, con l'obchectivo de situar en o centro d'o debat politico “una problematica que ya ye estructural en o conchunto d'o Estau y que s'agrevia de forma alarmant en Aragón, especialment en o Pirineu, como consecuencia d'a turistificación y las dinamicas d'especulación immobiliaria”.
En o Estau espanyol, mas de 4,5 millons de personas se troban en situación d'exclusión residencial, en un contexto marcau per la falta d'inversión publica y un parque de vivienda social clarament insuficient: tasament lo 3,3% d'o total, muito luen d'a meya europea. Mientres, en Aragón, la situación ye encara mas grieu, con menos d'o 0,5% d'o parque total destinau a vivienda publica, situando a lo nuestro país entre los cuals presientan menor cobertura publica.
Lo problema de l'acceso a la vivienda no ye exclusivo d'Aragón, sino que s'ha convertiu en una cuestión estructural en tota la Unión Europea. Seguntes la propia Comisión Europea, los pres d'a vivienda y los alquileres han aumentau de forma muito significativa en o zaguer decenio, deixando a millons de personas con creixents dificultaz pa acceder a una vivienda asequible.
En respuesta, la Comisión ha desenvuelto lo primer European Affordable Housing Plan (Plan Europeu de Vivienda Asequible), una estratechia comunitaria destinada a emparar a Estaus miembros, países como lo nuestro y ciudaz pa aumentar la oferta de vivienda asequible, amillorar la suya calidat y abordar las causas estructurals d'a crisi, como la falta d'oferta, la especulación y l'uso intensivo de alquilers de curta duración. Este Plan, que moviliza inversions publicas significativas y planteya reformas normativas y de gobernanza, se basa en a evidencia que nomás per medio de politicas publicas coherents —como bolsas de vivienda asequible, regulación d'o mercau y control d'usos turisticos— ye posible frenar la exclusión residencial y amillorar l'acceso a la vivienda.
Turistificación d'o Pirineu aragonés
En o Pirineu aragonés, esta crisi se veye especialment agreviada per la turistificación, l'uso intensivo de viviendas como aloches turisticos y la proliferación de segundas y terceras residencias. Esta dinamica ha provocau una reducción drastica d'o alquiler de larga duración y d'a ofierta de vivienda pa la población local, chenerando una puyada sostenida de pres, la expulsión de población resident y grieus dificultaz pa atrayer y mantener treballadoras esencials en sectors como la sanidat, la educación, los cuidaus u lo comercio local.
Dende Vivienda Digna d'o Pirineu advierten que este modelo “ye conducindo a un territorio desequilibrau, con municipios d'actividat economica estacional y sin base social estable”, y subrayan, amás, que esta situación “no ye inevitable” y que existen “ferramientas legals y politicas publicas contrastadas” que no se son aplicando.
Entre ellas, destacan la Declaración de Zonas de Mercau Residencial Tensionado, prevista en a Lei estatal de Vivienda, que permitiría regular pres, protecher lo alquiler residencial y enamplar lo parque publico. Manimenos, denuncian que lo Gubierno d'Aragón “no ha empentau dica agora medidas contundents en esta adreza”, tot y que numerosos municipios cumplen los criterios establius per la lei y pueden solicitar dita declaración.
Debant d'este escenario, lo movimiento ha tresladau a los partius un paquet de medidas concretas, basadas en evidencia empirica, en l'analisi de observatorios de vivienda y en modelos europeus de referencia, como lo de Viena, sustentado en vivienda publica municipal (Gemeindebau), cooperativas y asociacions de vivienda sin ánimo de lucro (Limited-Profit Housing Associations) y un fuerte liderazgo publico a traviés d'o Wohnfonds Wien.
Estas medidas no son propuestas utopicas, sino politicas que ya s'aplican en atros países d'a Unión Europea y que la suya eficacia pa amillorar l'acceso a la vivienda y guarenciar estabilidat residencial ye ampliament contrimostrada.
Propuestas contrastadas en Europa que funcionarían en Aragón
La primera d'as medidas propuestas per lo movimiento Vivienda Digna d'o Pirineu ye “enamplar lo parque de vivienda publica en alquiler a perpetuidad, per medio de bolsas de vivienda publica que consigan a lo menos lo 20% d'o parque residencial, priorizando la compra y rehabilitación frent a la nueva construcción”.
Amás, reclaman declarar como zonas de mercau residencial tensionado “a los municipios que asinas lo soliciten, en aplicación d'a Lei estatal de Vivienda”, y tamién “reestructurar los Plans Chenerals d'Ordinación Urbana (PChOU) y establir moratorias a las modificacions parcials que favoreixcan la especulación immobiliaria”.
Unatra d'as propuestas a los partius aragoneses pa lo 8F ye “empentar programas publicos de meyación en o alquiler, que ofreixcan guarencias a propietarios y seguranza a inquilinos, con l'obchectivo de movilizar vivienda vueda enta lo alquiler de larga duración”.
Tamién reivindican “promover cooperativas y asociacions de vivienda sin ánimo de lucro como alternativa estable y asequible a lo mercau especulativo”, y “controlar de forma efectiva l'uso turistico y lo fraude en os alquileres, dotando a los concellos de ferramientas y recursos pa la suya supervisión”.
Asinasmesmo, solicitan a las formacions politicas un compromiso pa “implantar taxas turisticas, destinando de forma finalista los recursos recaudados a politicas publicas de vivienda”, asinas cómo “crear oficinas de vivienda a libel municipal y/u comarcal que centralicen la chestión, la información y l'acompanyamiento en materia de vivienda”.
Asinas pues, lo movimiento Vivienda Digna d'o Pirineu interpela dreitament a los partius aragoneses y a la ciudadanía, recordando que “lo dreito a la vivienda ha d'estar un criterio central a la hora de pedir lo voto. No sirven promesas vuedas ni modelos caducos. Amenestemos compromisos concretos, medidas aplicables y politicas basadas en a evidencia si se quiere guarenciar lo futuro d'o Pirineu como un territorio vivo y habitable”.
Finalment, Vivienda Digna d'o Pirineu fa un clamamiento “a la organización colectiva”, vecinal, local y nacional “pa exichir medidas urchents que guarencien lo dreito a la vivienda y frenen la expulsión residencial en o Pirineu aragonés”.
