Lo documental replega lo valuroso testimonio de cualques habitants d'as montanyas, asinas como d'expertos y estudiosos d'o mundo rural. Lo catedrático y cheografo, Eduardo Martinez de Pisón, lo cheologo Anchel Belmonte, Luis Marquina, quí estase director d'o Parque Nacional d'Ordesa y d'as Tres Serols -Parque Nacional de Ordesa y Monte Perdido, en castellán-, u lo escritor y etnólogo Severino Pallaruelo, forman parte d'o elenco d'os entrevistados.
La cinta d'uns sixanta menutos de duración, tamién amuestra lo treballo de grans fotógrafos, biólogos u naturalistas de montanya como Javier Ara, Eduardo Viñuales, Chema Cereza u Paco Iturbe, buscando la gran valor que encara atesoran ixas montanyas, sin ixuplidar las menazas ambientals u los desafíos futuros pa tratar de preservar un paisache y uns ecosistemas en periglo, bien sía per desconoiximiento u per los intereses economicos que afectan a lo meyo natural alpino.
Los escenarios triaus pa lo rodaje han estau lo Parque Natural d'as Vals Occidentals -Parque Natural de los Valles Occidentales, en castellán-, las vals sobrarbenses de Chistau u de Bielsa, las vals de Tena y d'o río Aragón, toz éls en o norte d'Aragón, asinas como la zona de Trentino-Alto Adigio en Italia. Rincones d'altitut toz éls en os cuals succede la trama d'a historia y que han estau replegaus per la fotografía d'o suyo director Fernández Bordonada, familiarizado con o meyo rural y con os paisaches que esta vegada sirven de fondo pa tratar temas d'actualidat como la despoblación d'o mundo rural, la ganadería extensiva u l'afección d'o propio cambio climatico en os ecosistemas alpinos, asinas como la presión turistica u la creyación d'infrastructuras.
Este ye lo tercer largometraje documental a cargo d'o director y productor; Fernández Bordonada, qui dende la suya productora independient lanzará a primers de febrero una campanya de micromecenazgo en a plataforma Kickstarter, pa recaudar fondos y convidar a amigos, seguidores, conoixius y posibles inversores a emparar u sumar-se a esta propuesta documental divulgativa con identidat aragonesa y en defensa d'as nuestras montanyas, un bien universal que habremos de conoixer a fondo pa aprender a conservar-las millor.
