L'Aria d’Ensinyanza d'o Sindicato Obrero Aragonés (SOA) denuncia que dende fa cuatro anyos consecutivos lo profesorado d'educación secundaria de Luenga aragonesa no puede acceder a lo primer acto d'esleción como la resta de listas y especialidaz. "Deberán, per tanto, asperar un anyo mas a lo segundo acto, reservau a plazas de substitución y a las ampliacions residuals que se puedan dar entre lo verano", indica lo sindicato.
Esta aspera fa que "qui opten a ixas plazas deban, en primer puesto, priorizar atras listas en o primer acto d'esleción, a fin d'asegurar-se l'emplego". Dau que s'asperan a lo segundo acto "dengún les asegura que, per un costau, las plazas vaigan a salir y, per unatro costau, sían adjudicados en as mesmas", advierte SOA.
"Esto provoca que las plazas en este segundo acto, muito posiblement tornen a quedar desiertas en a suya mayoría, como en o curso pasau", contina lo sindicato.
Dende l'Aria d’Ensinyanza de SOA critican que "ya son cuatro anyos con cuantos gubiernos distintos en os cuals se da esta situación" y "dengún ye fendo cosa a lo respecto". "Los dreitos lingüisticos d'este alumnado no contan pa la DGA sía como sía lo partiu que gubierne. Ni per lo que pareixe pa garra sindicato con presencia en os órganos de representación d'o personal funcionario docent no universitario", concluyen.
