Dimpués d'a proposición de lei que l'ultraderechista Vox rechistró en as Corz d'Aragón, lo pasau mes de chunyo, con a finalidat d'eliminar l'aragonés y lo catalán d'Aragón como luengas propias, l'asociación cultural Rolde de Estudios Aragoneses lanzó una campanya de replegadas de sinyaturas pa "mantener la protección actual d'as nuestras luengas, guarenciar la suya supervivencia y impedir la suya desaparición".
La campanya "Mantener la protección legal de l'aragonés y lo catalán d'Aragón" lanzada en change.org, que ya s'ha zarrau, ha aconseguiu replegar l'emparo de 6.879 personas en as zagueras semanas. Amán d'a metat d'as sinyaturas proceden d'Aragón, en una campanya que ha contau con atros respaldos plegaus dende atros territorios, y arredol de trecientas de difuera d'o Estau espanyol, explican dende Rolde.
Esta asociación, que dende 1977 treballa per la promoción y la difusión d'a cultura aragonesa, ya ha presentau las sinyaturas debant d'o Gubierno d'Aragón (PP-Vox-PAR). Rolde confía que "entidaz culturals y socials, asinas como particulars", se sumen "a tota iniciativa endrezada a guarenciar la supervivencia d'as nuestras luengas propias y impedir la suya desaparición".
Rolde muestra la suya preocupación per la integridat de totas dos luengas minorizadas, aragonés y catalán d'Aragón, "protechidas per la Constitución espanyola, la Carta Europea d'as luengas, lo Estatuto d'Autonomía d'Aragón y la lechislación sectorial".
"Esta supresión d'a reconoixencia oficial, que lo partiu d'extrema dreita aduz como un paso enta lo complimiento d'o suyo pacto de gubierno con o Partiu Popular, suposaría la eliminación d'as luengas y los suyos nombres, impedindo la suya ensenyanza y la suya promoción y difusión, asinas como la d'a cultura expresada en estas luengas", advierten Rolde.
Cal recordar que, lo pasau 2 de chulio, la Chusticia d'Aragón Concepción Gimeno suchirió a la DGA implementar politicas en favor de l'aragonés y lo catalán y dio un plazo d'un mes a lo Gubierno PP-Vox pa acceptar u no la sucherencia, indicando en caso negativo las razons per las cualas no lo faiga. Gimeno atendió asinas a la queixa presentada en febrero per Rolde de Estudios Aragoneses, Consello d’a Fabla Aragonesa, Institut d’Estudis d'o Baix Cinca y Associació Cultural d'o Matarranya.
