Como viene fendo en os zaguers anyos, o Sindicato Obrero Aragonés (SOA) ha decidiu convocar huelga cheneral pa lo proximo 8 de marzo —Día Internacional d'as Mullers—. Una decisión emanada dende l'Aria d’a Muller d'o sindicato.
Asinas, este chueves, 13 de febrero, rechistró huelga laboral, de consumo y de cudiaus pa lo 8M en tot lo territorio aragonés, dando cobertura legal tanto en o sector publico como en o privau. "En breu, nos meteremos a negociar los servicios minimos con aquellas administracions que asinas lo requieran", explican en una nota de prensa.
Lo SOA sigue denunciando "la precariedad laboral que sufren las mullers aragonesas" y que "s'ha visto agrandida con l'actual crisi d'o capitalismo a toz los libels: climatico, aumento d'o coste d'a vida, social, etcetera". Este anyo centrarán la suya mobilización arredol d'un sector "tan precario y feminizado como ye lo d'o comercio". "Techo de cristal u goso pegajoso, ausencia de conciliación familiar, precariedad laboral, excedencias per cudiaus, chornadas parcials, desemplego, agresions, acosos…", denuncian.
Pa SOA "cosa ha cambiau". "Han intensificau la existent brecha de chenero en as familias aragonesas y incrementau la carga de estrés y ansiedad en as mullers que, encara estando millor formadas, tenemos mayor índiz de desemplego y precariedad laboral que los hombres, en asumir cuasi en exclusiva lo cudiau de personas mayors u familiars enfermos y lo d'os nuestros fillos y personas dependients a nuestro cargo", contina la nota.
Dende lo SOA demandan "toz los días y lo proximo 8 de marzo", lo complimiento d'a normativa en referencia a la discriminación salarial y a los plans d'igualdat en as interpresas, exichindo "la fiscalización de totas las administracions publicas, especialment d'Inspección de Treballo". Tamién que "las mullers migrants en Aragón no sufran opresión y precariedad per lo feito d'estar migrants. Queremos que totas las mullers que vivan en Aragón tiengan los mesmos dreitos y oportunidaz".
D'o mesmo modo, SOA quiere "una sanidat publica y accesible pa totas; servicios esencials publicos en tot lo territorio aragonés; una educación publica, laica y feminista; y que garra muller se quede en a carrera con os suyos fillos".
Lo Sindicato Obrero Aragonés sostiene que "la libertat s'aconsigue luitando, librando mil batallas, perdendo cualques pero con un horizont común d'igualdat y empoderamiento". "Somos aragonesas, antifascistas, racializadas, precarizadas. Per ello tornamos a convocar huelga cheneral lo Día d’a Muller Treballadera. Per la luita feminista dengún paso enta zaga!", concluye la nota.
Más sobre lo 8M en este vinclo.
