Puyalón de Cuchas acudió este martes a Barcelona, a la siede d'Esquerra Republica de Catalunya, pa la sinyatura d'o manifiesto “Ahora Repúblicas” (Agora Republicas), con o cual l'alianza de partius soberanistas, de cuchas, feministas, ecolochistas y antifascistas de diversas nacions sin estau pretenden dar emparo "d'una u unatra traza" a la candidatura Agora Republicas de cara a las eslecions europeas d'o proximo 9 de chunyo, como ya fesen en os anteriors comicios de 2019.
La coalición Agora Republicas ye conformada per EH Bildu (Euskal Herria), ERC (Catalunya), BNG (Galiza) y Ara Més (Illes Balears), y cuenta con l'emparo de Anova (Galiza), Ahora Canarias, Esquerra d'o País Valencià, EUiA (Catalunya), Comunistes de Catalunya, Andecha Astur (Asturies) y Puyalón (Aragón). L'obchectivo, "levar la voz d'a cucha, los dreitos y la libertat" a Bruselas y Estrasburgo. "Agora Republicas ye una opción valida pa totas aquellas personas que achugan per la paz, la diversidat, los dreitos, lo meyo ambient, l'antifaixismo y la sobiranía d'os pueblos", han destacau en l'acto en Barcelona.
La candidata d'ERC, Diana Riba, encabeza la coalición, con Pernando Barrena (EH Bildu) como numero dos. Lo responsable de relacions internacionals d'o BNG, Rubén Cela, ye lo numero tres, y como numero cuatro d'a lista ye lo representant de Ara Més, Biel Cursach.
D'este modo, Puyalón pedirá lo voto pa Agora Republicas, y "igual que l'hemos feito entre estes zaguers cinco anyos levaremos tot tipo d'iniciativas, preguntas y visitas a la Comisión Europea", pa que "conoixcan de primera man los problemas d'Aragón y puedan dar solución a las suyas inchusticias". "Frent a la menaza d'a ultraderecha, mas dreitos y mas cucha, tamién en Europa", han remarcau.
En o manifiesto, titulado "Per la democracia, los dreitos y las libertaz, Agora Republicas", advierten que "debant d'una Europa que afruenta l’ascenso d'a extrema dreita, lo retorno d'as politicas d'austeridat y la menaza d'o cambio climatico, Agora Republicas ye una alianza comprometida con a defensa d'os dreitos socials y laborals, con un modelo de sociedat solidario, feminista, ubierto, ecolochista y democratico, per defender y conquerir toz los nuestros dreitos como personas y como pueblos".
Agora Republicas desfiende "lo dreito a l'autodeterminación como motor d'una Europa de nacions libras y iguals, la fortalesa y l’impulso d'a luenga y la cultura d'os nuestros países, un estau d'o buenpasar que guarencie oportunidaz y dreitos a las nuestras sociedaz", y "una Europa que actúe de traza adecuada a las diversas realidaz, que reconoixca la insularitat como elemento diferencial. Una Europa verda y chusta".
Tamién desfiende "un modelo de sociedat que incentive lo teixiu productivo y industrial, la innovación y lo desembolique; que permita a los chóvens crear y desenvolver lo suyo propio futuro y que cudie d'o present y d'o futuro d'a nuestra chent gran. Un modelo de sociedat que promueva y guarencie la riqueza cultural y lingüistica d'os pueblos, internacionalista y pacifista; que empente un modelo de desembolique chusto, y verde, que defienda lo meyo ambient y luite contra lo cambio climatico; un modelo de sociedat que no tanque buegas a quí nomás busca un futuro digno; un modelo de sociedat que combata lo faixismo y la xenofobia".
En este especial toda la información de las elecciones europeas del 9J.
