Iste miercres 29 se presentará 'Parola de diaplerona', lo nuevo libro de Carlos G. Esteban. Ye lo suyo tercer libro en aragonés, publicau con Círculo Rojo y l'Asociación Cultural Nogara, y se presentará en lo bar Pottoka, en lo zaragozano barrio d'a Madalena, a on que sucede buena parte d'a historia.
'Parola de diaplerona' torna a l'universo d'o suyo primer libro, 'Parola de follet' (2019), un mundo pleno de referencias a la mitolochía aragonesa, actualizaus a lo sieglo XXI y a on que las parolas son parte alazetal d'a machia de totz ixos sers. En ista ocasión, en cuenta d'una replega de relatos, se tracta d'una novela en dos actos, protagonizada por una choven diaplerona estudiant de lingüistica que viacha por toda mena de scenarios d'a ciudat de Zaragoza. Entre las pachinas suyas conoixeremos a un follet lector de boiras, lo bubón que cusira Chuslivol, lo autoritario gubierno diaplerón de Baixo-La-Uerva u la misteriosa sociedat Canzhis y los suyos plans pa amagar lo pasau d'os folletz.
Ye lo tercer libro en aragonés de l'autor de 'Parola de folle't (2019) y 'Penchada d'un filo' (2020), que en 2022 publicó la suya primer novela en castellano 'Hechos de tinta', con Imperium ediciones. Antimás d'a suya actividat en lo blog y podcast Tierra de barrenaus, a on que contina publicando relatos y articlos, en iste anyo ha ubierto unatro blog en castellano, Entre cortesía y colofón, que aculle beluna d'as suyas creacions literarias antimás de resenyas de libros y eventos.
La presentación se fará a las 19:00 en lo bar Pottoka, d'a carrera Martín Carrillo, d'o barrio d'a Madalena. Dimpués, lo libro se podrá mercar en l'Asociación Cultural Nogara-Religada, en la Plaza Asso. Carlos G. Esteban tamién será present en lo día d'o libro, en diferents paradas, firmando eixemplars de toda la suya obra.
