L'Asociación Cultural y Escuela d'aragonés Nogara fa este 2021 lo suyo 30 aniversario “y queremos celebrar estos 30 anyos d’escuela y de treballo por l'aragonés con responsabilidat, organizando actividatz adequadas a la situación que somos vivindo. En estas circumstancias los nuestros cursos ya habioron d'adaptar-se, pasando de presencials a formato semipresencial y enamplando la ufierta online d'anyos anteriors”, senyalan dende Nogara.
“En este contexto, organicemos lo Concurso de relatos curtos Nogara 30 pa l'alumnau d'os cursos y d’as personas socias de l'asociación”, explican, asinasmesmo, fan l’aununcio de que “lo pasau 23 d'abril se fació publico lo siguient veredicto d'o churau”:
Categoría iniciación:
- (ex aequo) Fito-fito, de Verónica Larraz y La pedra, de Feliciano González
- 30 numers, de Francisco Ruíz
- Relato sin títol, de Monica Pueo
Categoría abanzada:
- Un final d'espanto, de Serchio Soriano
- Nomás una gambada, de María Nuria Campo
- Un viache por a historia de Zaragoza, de Jorge Orduna
Dende Nogara, quieren destacar “la gran acceptación d'o concurso, con a-saber-lo relatos y mesmo belún plegau dende l'extranchero”, y tamién “agradeixer a l'alumnau la suya participación, pa muitos y muitas yera la primera vegada que escribiban en a lengua que son aprendendo. Ye un argüello compartir prochecto con chent que, mesmo en estos tiempos, no rebla y fa por vivir en aragonés”.
Puetz leyer os relatos ganadors libre y integramente.
Fito-fito, de Verónica Larraz
O faguenyo feba que os suyos pels isen a boldregons. Dende astí alto, de piet en a sarda, podeba veyer o lugar de carreras estreitas sin diferenciar a la chent, como un lugar pantasma, vuedo de vida. Cilia notó cómo a traiduría le fació surtir una glarima que le esvaró aprisa por o caixo. Inspiró como si le faltase l'aire y a fredor dentró en os suyos livianos sobatendo o suyo interior. Ixe silencio rudioso, ixa fredor penetrant le feba sentir viva. Agafó os suyos pels embrancaus, chuntó os chenullos dica oprimir o suyo peito y los rodió con os suyos brazos fendo-se una boleta -clica pa leyer-lo integrament-
La pedra, de Feliciano González
La colla de treballadors repllegaban las suyas ferramentas, con el animo de rematar la chornada y tornar lluego ta la residencia. Encara no teniban casa propia, més que tot per que yeran los primeros colonos en llegar-ie y la mayoría del llugar permaneceba estricallau de raso. Con tot y con ixo se’n i heban afirmau una patacada chent que irían llegand de contino. El plan de repoblación yera ben furniu y rulaba en atros puestos muit ben. La chent baruquiaba per fuir a tot trance de las ciudatz, tornar a lo natural y treballar de traza comunal, en conchunto, sin prechuicios de llenguas, razas u culturas diferents. Shaira yera una de ixas presonas, veniba de Francia y tamé charraba castellán -clica pa leyer-lo integrament-
Un final d'espanto, de Serchio Soriano
- O churau ha determinau que os delitos que se le acumulan a la imputada han quedau prou contrimostraus. Por tot ixo debemos condenar y condenamos a la sinyorita María Chesús Vinyuales Lanau como responsable d’os delitos de fraude, apropiación indebida y blanqueo de capitals… y a lo cumplimiento de ueito anyos de prisión BAM, BAM, BAM!!!
Ixos tres mallazos que o sinyor chuez fotió dimpués de dictar a mía sentencia se ficoron en o mío interior escruixinando-me. Bien se vale que en una vida plena de furtos y gardas no han puesto prebar que tres delitos financieros que he feito en os zaguers anyos -clica pa leyer-lo integrament-
