O Ligallo de Fablans zelebra ras suyas 40 añadas con o enguero d’una nueva siede en o zentro de Zaragoza

L’asoziazión fa 40 añadas dende a suya creyazión e cuenta con una zentena de sozios e sozias e un importán fundo bibliotecario

L’Asoziazión Ligallo de Fablans de l’Aragonés cuenta ya con una nueva siede en o zentro de Zaragoza. Situata en o Centro Comercial “Caracol” (Independencia 24-26- planta -1, local 71), iste local ubre as suyas puertas a ra zentena de sozios e sozias que forman l’asoziazión.

A inaugurazión se desembolicará o miércols a ras 18.30 oras e contará con a presenzia de la Dirección General de Política Lingüística: José Ignacio López Susín, director general de Política Lingüística; Francho Beltrán Audera, jefe del Servicio de la Dirección General de Política Lingüística; y Sergio Larraga Martínez, secretario general técnico de la Consejería de Industria del Gobierno de Aragón.

A nueva ubicazión d’o Ligallo permite amparar un aula ta ras clases d’Aragonés, charradas e chuntas e atra cambra ta l’ampla biblioteca sobre a cultura e a luenga aragonesa que atresora l’asoziazión.

D’ista mena, o Ligallo zelebra o 40 cabodaño suyo. O suyo presidén, Guillén Forcada, asegura que a nueva siede servirá ta “amanar encara más a lengua e cultura aragonesas ta ra carrera e dar-li continidat”.

Antimás, en ista nueva etapa, asegura Guillén Forcada “o Ligallo nunziará nuevas autividaz ta reprener entre toz/tas a fuerza, o esprito e o dinamismo d’ista asoziazión, emblema d’a luita por a Lengua Aragonesa.

Entre os suyos proyeutos de futuro será a reedizión e publicazión d’a revista Orache, simbolo e altavoz d’o Ligallo dende os suyos oríchens; a produzión de nuevos libros, e a organizazión d’escursions, conziertos e autividaz d’ozio relazionato con o suyo ambito de treballo.

Qué ye o Ligallo?

O Ligallo de Fablans de l’Aragonés ye una asoziazión cultural creyata en 1982 con l’ochetivo de promover e difundir a Lengua Aragonesa.

Dende o suyo naximiento, ha promovito publicazions, conziertos e charradetas en a carrera, autividaz ludicas e d’ozio, antimás d’una federazión d’asoziazions que s’ha estendillato por os lugars d’Aragón en pro de l’amostranza d’a Lengua Aragonesa.

Se trata d’o primer mobimiento serio soziopolitico d’activismo e divulgazión, animazión soziocultural e reivindicazión soziopolitica por l’Aragonés.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de nuestra política de cookies, pincha el enlace para más información.

ACEPTAR
Aviso de cookies