“Muguruza FM 40 Tour” prencipia iste viernes, 13 de noviembre, o suyo recorriu por las salas de cine. O documental, dirichiu por Ander Merino Etxebeste y o propio Fermin Muguruza, plega ta la gran pantalla dimpués d’o suyo estreno mundial en o Velodromo d’Anoeta, en Donostia, debant de 3.000 personas, y de pasar por diferents festivals en Toulouse, Ciudad de Mexico, Barcelona y Londres.
Pero entre las primeras salas y localidatz anunciadas no bi ha garra d’Aragón. Ni Zaragoza, ni Uesca, ni Teruel figuran en una programación que, por agora, incluye proyeccions en Euskal Herria, Madrid, Galiza, Catalunya y País Valencià, amás de diferents citas en Ipar Euskal Herria. Encara no s’ha anunciau si o documental plegará mas entadebant ta los cines aragoneses.
Entre o 13 y o 19 de noviembre, a cinta podrá veyer-se en Iruñea, Gasteiz, Donostia, Bilbo, Portugalete, Durango, Azkoitia, Errenteria, Madrid, Vigo, Compostela, Barcelona y Sant Feliu. A programación continará con pases en Lleida o 18 de noviembre, València o día 20, Eibar entre o 22 y o 30, y Saint-Brieuc entre o 25 y o 30.
En Ipar Euskal Herria, Muguruza presentará ell mesmo o documental en Hazparne (19 de noviembre), Urruña (25), Baiona (26), Donibane Garazi (28) y Hendaia (29).
Como ya contamos en AraInfo con motivo d’o estreno en o Zinemaldia, “Muguruza FM 40 Tour” no ye nomás un documental de conciertos. A camera acompanya a Fermin Muguruza por carreteras, camerinos y escenarios, recuperando quaranta anyos de mosica, militancia y resistencia, dende Kortatu y Negu Gorriak dica o suyo camín en solitario.
A cinta amuestra tamién a frachilidat, o cansancio, os reencuentros y a comunidat que s’ha construyiu arredol d’as suyas cancions. Una historia que atraviesa mugas y cheneracions, con a censura, a memoria y o compromiso politico como parte inseparable d’o viache. Quaranta anyos de mosica y resistencia que agora continan en os cines. De Irun ta lo mundo, kolpez kolpe. Pero, por agora, sin parada en Aragón.
