Este pasau chueves a las 12 d'o meyodía, los chardins d'a Residencia Universitaria de Chaca han estau lo escenario d'a devantadera d'a escultura Lo Trovataire, una obra d'o escultor, poeta, avogau y politico aragonés Emilio Gastón. Esta figura, realizada en fierro y que data de 2002, evoca la imachen d'un trovador medieval, con o suyo traste y atuendo caracteristico, y mide un metro d'altura.
Emilio Gastón, qui tamién ocupó lo cargo de Chusticia d'Aragón entre 1987 y 1993, estió un destacau creyador en l'ambito d'a escultura en fierro, combinando la suya pasión per las artes con a suya trayectoria en a poesía y la politica. Lo Trovataire ye una muestra representativa d'a suya obra, en a cuala cuantas chapas de fierro retalladas y soldadas s'unen pa dar vida a esta figura antropomorfa.
La escultura ha estau donada a la Universidat de Zaragoza y colocada en a residencia de Chaca, en reconoixencia a la estreita relación de Gastón y la suya familia con Echo, la localidat natal de Domingo Miral, y con os tradicionals Cursos de Verano que se celebran en Chaca. Esta no ye la primera contribución d'a familia Gastón a la universidat, ya que en 2022, Carmen Gascón, viuda d'o escultor, entregó unatra obra titulada "Constitución" a la Facultat de Dreito de Zaragoza.
La ceremonia de devantadera ha contau con a presencia de Carmen Gascón, la vicerrectora de Cultura y Prochección Social d'a Universidat de Zaragoza, Yolanda Polo, l'alcalde de Chaca, Carlos Serrano; y la presidenta d'a comarca d'A Chacetania, Olvido Morantinos, qui han destacau la importancia d'a obra como parte d'o patrimonio cultural d'o país.
