Lo Movimiento per la Dignidat d'a Montanya ha recorriu tot o Pirineu entre este verano realizando mas de 40 asambleyas y ha replegau las prencipals demandas d'o territorio, aunando “las luitas d'os suyos habitants en una sola voz”.
Este cabo de semana se fació la presentación simultania d'a manifestación “Per una Montanya Digna. Pirineu Vivo” en as localidaz de Campo y Chanovas. “Lo Pirineu no se vende, vivienda digna, treballo digno y servicios son os cuatro pilars” d'as reivindicacions d'a manifestación “Per una Montanya Digna. Pirineu Vivo” d'o 25 d'octubre en Chaca.
“S'han triau Campo y Chanovas per lo simbolismo que represientan toz dos puestos en la luita contra la construcción de embalses en Aragón”, y totas dos localidaz s'han feito publicas las reivindicacions d'o movimiento de forma simultania, que s'han replegau, a la suya vegada, en un documento -veyer integro- en o cual destacan las siguients reivindicacions.
Lo Pirineu no se vende
Lo Pirineu aragonés ye constantment menazau per diversos prochectos privaus que extrayen la riqueza d'o territorio (augua, suelo, electricidat etc.) subvencionadas con grans cantidaz de diners publicos “mientres se deixan de costau las necesidaz reals d'as personas que habitamos lo territorio”, sinyalan. Per ixo se pide la renuncia definitiva a lo recrecimiento de Yesa, la fin d'os prochectos especulativos ligados a lo esquí y a lo turismo masivo enmarcaus en o Plan Pirineus y un nuevo modelo enerchetico.
Vivienda digna
Os pres d'a vivienda no s'achustan a las posibilidaz d'a mayoría d'as personas pa la compra u lo alquiler d'una primera vivienda. Lo boom d'os apartamentos turisticos chunto a la cantidat de segundas u terceras residencias, ha feito estallar los pres y con éls las posibilidaz d'os suyos habitants. “Exichimos la regulación d'as viviendas turisticas y un aumento significativo d'a vivienda asequible, especialment publica”, enfatizan dende lo Movimiento per la Dignidat d'a Montanya.
Treballo digno
Lo modelo de desembolique economico imposau dende la Deputación Cheneral d'Aragón (DChA) pa o Pirineu privilechia lo turismo de nieu frent a la resta de sectors economicos. “Este modelo conlleva unas condicions de vida precarias pa la clase treballadera, ya que promueve treballos temporals que no cubren l'anyo entero, salarios baixos y emplegos de baixa cualificación. Amás, las inversions se destinan a unas vals concretas, afogando las posibilidaz de combatir la despoblación en a resta d'o territorio”, subrayan dende lo Movimiento.
Servicios publicos de calidat
“Pa fer posible la vida en o Pirineu ye imprescindible cudiar y mantener uns servicios publicos de calidat en os ambitos d'educación, sanidat, extinción d'incendios y cultura”, reivindican, asinas como “la millora d'as comunicacions en forma d'accesos a los lugars mas chicoz, transporte publico en o meyo rural y telecomunicacions d'internet”.
Lo simbolismo de la luita contra os grans embalses
La calendata y los dos puestos triaus pa presentar la manifestación “son especialment simbolicos per lo suyo papel en la luita contra os grans embalses en o Pirineu”, destacan. Lo 29 de setiembre de 1986 Campo y los lugars d'a suya redolada “tornoron a naixer, ya que se salvoron de desapareixer baixo las auguas d'un pantano gracias a la luita y sacrificio d'a suya chent”. Dende alavez, en Campo se celebra una fiesta popular arredol d'ixa calendata pa recordar esta important victoria colectiva, que en os zaguers anyos s'ha visto renovada en o Festival Riada contra la despoblación rural.
En Chanovas os días 26 y 27 de setiembre se celebra la fiesta d'o lugar, en a cuala se reunen de nuevo toz los vecins y vecinas que estioron feitas fuera a la fuerza per un pantano que nunca se construyó. Esta localidat sobrarbesa ye un simbolo “de luita y resistencia pa lo Pirineu y pa tot Aragón”, recuerdan.
Per tot ixo, lo Movimiento per la Dignidat d'a Montanya fa un clamamiento “a tota la sociedat aragonesa a participar masivament en a manifestación d'o 25 d'octubre de 2025 en Chaca”, la cuala contará tamién con un concierto d'a cantautora grausina Ana Mur Tena, los turolenses Ni Zorra! y la Ronda de Boltaña.
