L'obchectivo ye ubrir un foro de debat y reflexión pa la protección d'a Canal Roya y lo suyo entorno “proporcionando ferramientas tecnicas, cientificas y politicas pa la suya futura chestión de conservación”. Tot ixo enmarcau en un modelo sostenible “que guarencie lo futuro d'a población d'as vals, conciliando la preservación d'un paisache unico con o dreito d'as nuevas cheneracions a remanir y desenvolver-se en o suyo territorio”, destacan dende la organización.
“Este obchectivo viene marcau per la tremenda importancia como patrimonio natural y cultural d'este enclave y per las amenazas que se ciernen sobre lo mesmo a causa de seguir, incomprensiblement, sin garra figura de protección. La zaguera d'ixas amenazas, lo telecabina Astún - Formigal que prochectaba destruyir-lo, estió precisament frenada per la masiva mobilización social debant d'estas valors patrimonials que habrían d'estar protechius”, recuerdan.
Lo Congreso se celebrará lo cabo de semana d'o 17 a lo 19 d'abril en a ciudat de Chaca, en a Siede d'a Comarca d'a Chacetania y ye organizau per un Comité tecnico organizador d'o propio congreso formau per personas d'o sector cientifico, tecnico, churidico, ambiental y residents en o Pirineu.
Conta amás con tota una serie d'organizacions que lo promueven y una lista d'entidaz colaboraderas “que se van unindo pa asegurar l'exito d'este congreso”.
“Tota esta información inicial -incluyiu un primer borrador de programa-, que s'irá enamplando conforme abancen las semanas se puede consultar en a web d'o Congreso pirenaico Canal Roya”, destacan dende la organización de l'evento.
En esta mesma web “se podrán realizar las inscripcions a lo Congreso, que s'ubrirán en o mes de febrero”, concluyen.
