Este proximo martes, 16 de setiembre, lo Concello de Chaca / Jaca debatirá en pleno la propuesta de refuso a lo prochecto Oroel Park “una iniciativa que ha devantau una aclapadora respuesta ciudadana en contra d'un descalabro medioambiental, a una velocidat sin precedentes en a nuestra ciudat”, subrayan dende ‘Oroel no se toca’, que insta “a toz los representants politicos, a que actúen en coherencia con a clamor popular, y voten en contra d'un prochecto que menaza lo nuestro patrimonio historico y natural d'os chacetanos”.
“Queremos recordar que en a multitudinaria manifestación celebrada a las puertas d'o Concello estioron presents representants de toz los grupos politicos, con dos excepcions: lo grupo impulsor d'o prochecto, encabezau per Lucía Guillén, que la suya formación politica Aragoneses ya no existe, y l'alcalde de Chaca / Jaca con o suyo grupo, socio de gubierno de Guillén. Igualment, resulta necesario subrayar que lo que hue pretenden levar a cabo no amaneixe en o suyo programa electoral, y que con ixo son enganyando a la ciudadanía”, enfatizan dende la plataforma civica.
La oposición a este prochecto ha blincau ya de l'estrictament local a la esfera nacional, estatal y mesmo internacional “igual que succedió con la Canal Roya, y s'ha manifestau de traza clara y contundent a traviés d'as numerosas y razonadas alegacions rechistradas per vecins a títol individual, asociacions y destacadas figuras d'o mundo montanyero y cientifico. Totas ellas han meso de relieve grieus irregularidaz: dende la falta de guarencias ambientals dica la incompatibilidat d'o prochecto con a normativa europea, que impide financiar con fondos Next Generation actuacions que puedan causar un danyo significativo a lo meyo ambient”, recalcan.
En este mesmo sentiu, ‘Oroel no se toca’ ye tallant y asevera que “los representants politicos son los representants d'o lugar. Ye en éls en qui hemos depositau la nuestra confianza y agora tienen la responsabilidat de frenar este despropósito. Agora les corresponde a éls estar a l'altura y refusar un prochecto que mete en risgo lo nuestro patrimonio natural mas emblematico: lo Monte Oroel. Un paisache protechiu que promoviemos la suya creyación y festejamos un 30 de chinero de 2007, y contra lo cual agora se pretende atentar”.
Dende ‘Oroel no se toca’ concluyen asegurando que “si lo prochecto ye aprebau en Chaca, somos decidius a ir dica lo final. No dudaremos en acudir a la chusticia europea pa chitar-lo enta zaga. La defensa d'o nuestro entorno no admite cesión beluna”.
