Coincidindo con o Día Mundial d'a Luenga Materna lo salón de plenos d'o Concello de Fonz ha aculliu la presentación d'a XXII edición d'o certamen literario ‘Condau de Ribagorza’ en aragonés bajorribagorzano que organizan de forma itinerant los consellos foncense, grausino y estadillano. Este anyo recaye en Fonz la convocaría d'o concurso y la organización de la entrega d'o premio que se fallará lo 23 d'abril, Día d'o Libro y d'Aragón, en o qual se realizará un acto d'exaltación d'a luenga bajorribagorzana que sigue viva en estes municipios.
La presentación ha reuniu a los tres concejales de Cultura d'os respectivos concellos, María Clusa (Fonz), Jordi Cañavate (Estadilla) y Julián d'o Castiello (Graus), asinas como a la tresorera d'a Sociedat Lingüistica Aragonesa (SLA), María José Girón, entidat que ofreix asesoramiento academico a lo concurso.
Los concellos han reiterau lo compromiso de seguir convocando este certamen en as variants de narrativa y verso pa contribuyir a mantener “una luenga en a quala queremos seguir vivindo y un patrimonio immaterial d'o qual cada vegada somos mas orgullosos y que cada vegada conta con mas voces pa desfender-la”, como ha sinyalau María Clusa.
Asinasmesmo, los concejales han plantiau que pa la proxima edición se pueda convidar a participar en a convocatoria a los consellos d'as localidatz an se charra aragonés en as suyas distintas modalidatz como Benás, Seira, Lascuarre, Campo, Azanuy, Santo Esteban de Litera, Roda de Isábena, Lierp, etc.
A los concellos d'estas localidatz, asinas como a las asociacions locals que treballan en pro d'as suyas luengas se les convidará a asistir a l'acto d'entrega de premios “pa aconseguir que este certamen sía mas gran”.
“Dende lo Concello seguiremos treballando per mantener la nuestra luenga con propuestas como las presentacions de libros, actividatz y tallers dende la Usina de Turismo, lo festival Ixufrina Rock u atras que chiran arredol d'este patrimonio immaterial que nos fa solos y irreductibles”, ha concluyiu Clusa.
Clusa ha indicau que “i hai una grupo de chovens talentos d'a nuestra comunidat que nos fa contento l'alma, prescriptores d'a nuestra luenga materna. Músicos, comunicadores, influencers, presentadors, bloggeros, mayestros, artistas, historiadores, cantantes de rock (y dica de ópera), y como no, escritors. Agradeixer a totz ells y a tota la chent que d'una u unatra traza la mantiene viva. Ye en as nuestras mans”.
Lo edil estadillano ha animau tamién a la participación “pa aconseguir que esta edición sía un exito per lo numero de relatos y poemas y que lo concurso siga creixendo”.
Per la suya parte, lo concejal de Graus ha sinyalau que los chestors publicos “debemos contribuyir con a continuidat en o futuro d'o patrimonio immaterial que ye la nuestra luenga” y ha recalcado que se debe concienciar a los mas chovens “que son lo futuro y si ells no charran lo bajorribagorzano será condenau a desapareixer. Quan se deixa morir una luenga resulta imposible aconseguir nuevos brotes”. Y ha deseyau que arredol d'este concurso los participants “troben un puesto libre en o qual desenvolver a traviés d'a literatura lo que piensan y cómo lo piensan”.
Los textos se redactarán como siempre en ortografía castellana. Una d'as novedatz d'esta edición ye que los textos presentaus en a Grafía De Lingua Aragonensis (DLA) serán valorados positivament per lo churau. “La grafía sigue las zagueras novedatz d'a qüestión normativa y seguimos las recomendacions d'as corrients reguladoras d'o mundo de l'aragonés y d'a recientment naixida Academia d'a Luenga Aragonesa, respectando la radiz etimolochica d'a nuestra luenga. No ye facil pa una persona escolarizada en castellán pero se valorará qui lo faiga”, ha sinyalau María José Girón. La Grafía DLA se puede consultar en o siguient vinclo.
Los treballos orichinals habrán de #presentar dica las 10.00 horas d'o 8 d'abril a lo correu electronico info@espaciopirineos.com con a referencia Condau de Ribagorza (en unatro documento habrán d'adchuntar lo #DNI, nombre, apellidos, edat y datos de contacto).
Los orichinals serán escritos en ribagorzano en qualsequiera d'as suyas variants (Graus, Fonz, Estadilla, Chuseu, Torres, Panillo, Capella, La Puebla de Castro, Secastilla, Perarruga, Santliestra, Campo, etc.). Los treballos habrán de tener una extensión entre tres y cinco folios A 4, con letra Arial 11 puntos, con espacios y chustificación normal. La metrica d'os poemas será libre y la extensión habrá d'estar superior a 40 versos y inferior a 200. S'admitirán un maximo d'orichinals per cada autor.
Lo premio ye dotau con 600 euros en a modalidat de relatos y 300 en a de poesía. La publicación d'as obras ganaderas correrá a cargo d'os concellos organizadores.
Libro homenache en Estadilla
Lo concejal de Cultura de Estadilla ha animau a participar en os actos que lo municipio celebra con motivo d'o Día d'a Luenga Materna como la presentación esta tarde de recursos audiovisuals pa ninos en aragonés bajorribagorzano y la canal de YouTube de cuentos animaus y cancions en aragonés de Daniel Giménez, mayestro de luenga aragonesa en o C.R.A. La Candeleta. Estadilla tamién acullirá lo domingo la presentación d'o libro ‘L'imachinario de Pedré’ con poemas d'Antonio Sarroca que formarán parte d'o patrimonio cultural de Estadilla. L'acto se desenvolverá en o Salón Buñero a las 12:00 horas con a presencia de familiars de l'autor ya feneixiu.
