L’Asoziazión de Nabaters d’a Galliguera “ye muito más que una asoziazión: somos os e as guardians d’una tradizión que coneuta o pasau, presén e futuro en as auguas d’o Galligo. Dillá d’a recreyazión istorica, esfendemos autibamén o ríu Galligo como exe bertebrador d’a nuestra comarca, reibindicando a suya importanzia en a cultura e economía local. Iste erenzio, reconoxiu por a UNESCO como Patrimonio Inmaterial d’a Umanidá e declarau Bien d’Intrés Cultural Inmaterial por o Gubierno d’Aragón, sigue bibo grazias a o nuestro esfuerzo e rasmia”, sinyalan.
Nabaters d’a Galliguera naxió en l’anyo a 2000 con un suenio: “recuperar a memoria d’os antigos nabaters e tornar as nabatas a o ríu Galligo. Ixe primer deszenso dende Morillo dica o puen de Santolaria marcó o inizio d’una abentura que ya suma más de dos dezenios d’istoria e más de 20 deszensos esitosos”.
“A construzión e nabegazión d’as nabatas ye un treballo desichén que demanda meses de paranza. Dende a curta de salzeras en luna mingua de febrero dica o deszenso en primabera, dezenas de boluntarios e boluntarias adedican o suyo tiempo e esfuerzo a mantenir bibo iste erenzio. En o nuestro magazén de Biscarrués, conserbamos e paramos os materials que nos premiten recreyar cada añada ista tradizión zentenaria”, recalcan.
Enfortimiento d'a identidat cultural aragonesa con prochección internacional
La Comisión de Meyo ambient y Turismo d'as Corz d'Aragón ha aprebau, per unanimidat, una proposición no de lei, empentada per CHA, pa reconoixer y empentar lo tradicional descenso de nabatas per lo río Galligo.
La iniciativa, esfendida per lo portavoz de CHA, José Luis Soro “pone en valor lo treballo de l'Asoziazión de Nabaters d’a Galliguera como entidat clau en a conservación d'o patrimonio cultural aragonés y promotora d'una actividat con prochección internacional”.
Soro subrayaba “la relevancia d'esta aprebación” perque contribuye “a lo mantenimiento d'as nuestras tradicions, a l'enfortimiento d'a identidat cultural aragonesa y a la dinamización turistica d'a comarca d'a Plana de Uesca”.
Asinas, mas concretament los puntos aprebaus per las Corz d'Aragón dimpués d'a iniciativa de CHA son: “Reconoixer la labor de l'Asoziazión de Nabaters d’a Galliguera como entidat dinamizadora d'o patrimonio cultural aragonés y promotora d'una actividat con prochección internacional”, asinas como “valorar lo impacto positivo que esta actividat tiene sobre lo turismo rural, lo desembolique sostenible y la economía local d'os municipios de Biscarrués, Morillo de Galligo y Santolaria de Galligo”, y per zaguer “empentar campanyas de promoción turistica que incluigan lo descenso de nabatas en o río Galligo dentro d'a ofierta cultural y patrimonial d'Aragón”.
Lo portavoz de CHA celebraba amás “que esta actividat haiga estau recientment declarada Actividat d'Interés Turistico d'Aragón per lo Gubierno d'Aragón, una reconoixencia que plega dimpués d'a presentación d'esta iniciativa parlamentaria”.
Finalment, en a suya intervención, Soro destacaba “lo impacto economico de l'evento”, sinyalando que cada edición “chenera actividat en a hostelería, mueve lo comercio local y atraye turismo rural”, bella cosa que s'aconsigue “sin depender de grans presupuestos”. Asinasmesmo, reivindicaba “la suya valor social y cultural: fortalece lo teixiu social y contrimuestra que la cultura ye bella cosa que se celebra en os lugars con orgullo y con radices”.
