Esta nueva edición consolida un prochecto cultural que naxió con o firme proposito “d'estar mallata y altavoz pa la cultura aragonesa contemporania”. Desenrrollada de traza colaborativa por un equipo de mullers, Alparcera contina teixindo rez en o país. En este numero de chunio, a revista mantiene o suyo firme compromís con a pluralidat lingüistica d'Aragón, ofreixindo contenius orichinals en as suyas tres luengas propias: aragonés, catalán y castellano.
Una uellada critica y diversa a l'Aragón de hue
Si o primer numero serviba como carta de presentación, esta segunda entrega afonda en l'analisi social y a riqueza artistica d'a comunidat. A traviés d'una cudiada selección d'articlos, entrevistas a fundo, relatos, ilustracions y ensayos visuals, as pachinas d'Alparcera convidan a reflexionar sobre a chestión d'os nuestros entornos naturals d'alta montanya, os mitos d'a nuestra historia u as dinamicas d'a choventut en o meyo rural.
“Queremos fer espacio a las istorias que cudian d'a nuestra tierra y a propuestas artisticas que reinterpretan os nuestros simbolos dende nuevas sensibilidaz”, explican dende o consello editorial. En esta ocasión, destacan as colaboracions d'investigadoras y autoras como Nuria Lleida Añón, qui en o suyo articlo ‘Los aquelarres, sexo, drogas y rock and roll?’ aporta una uellada rigurosa sobre lo control social e historico en o Pirineu aragonés a traviés de diversas figuras. O numero tamién cuenta con as perspectivas de María Torréns Muzás analisando a la chovenalla en ‘Cultura de chamizo’, y d'Eva Escalona Acín, qui sinya una necesaria guía de buenas practicas ambientals en ‘Cómo ser un buen turista en un ibón’, aportando nuevas envistas a lo debate cultural aragonés en este momento de l'anyo.
Án conseguir a revista?
“Pa aquellas que deseyen fer-se con un eixemplar fisico, pueden contactar con Alparcera a traviés d'os suyos rez socials u acudir a cualques d'as librerías que ya son puntos de venta d'a revista: Librería General y Librería El Siglo en Chaca y La Pantera Rosa en Zaragoza. Manimenos, a lo largo d'o trimestre trobarez en o nuestro instagram resumens d'os articlos que hemos publicau”, sinyalan dende a colla editora.
Amás, “a convocatoria pa participar en o tercer numero d'agüerro ya ye ubierta pa cualsiquier persona que deseye ninviar a contacto@alparcera.com articlos, fotografías, poemas u ilustracions vinculadas a lo territorio. Continamos!”, concluyen.
