L'equipo editorial de Alparcera anuncia lo lanzamiento oficial d'a suya nueva publicación cultural, un prochecto feito per mullers, desenrrollau en os zaguers meses, y con a participación de creyadoras, investigadoras y amants d'a cultura aragonesa.
Alparcera surche como un espacio “pa refirmar a identidat aragonesa dende la creatividat y lo pensamiento critico, amostrando un Aragón diverso y en transformación”. L'obchetivo ye ufrir “un espacio pa la reflexión y lo dialogo”. Lo suyo conteniu abarca temas como la literatura, la gastronomía, la mosica u los movimientos socials, siempre dende una anvista critica y actual.
La revista presenta una combinación d'articlos de fundo, entrevistas, reportaches, ilustracions y ensayos visuals que miran d’acercar a lo publico as nuevas perspectivas y voces criticas en Aragón. “Cada trimestre, esnavesamos Aragón de nort a sud, con articlos que conviden a la exploración y a la conversación cultural. Y, prou que sí, lo feremos en as tres luengas propias: l’aragonés, lo catalán y lo castellán”, sinyalan.
Con esta primera edición, Alparcera convida a la sociedat a descubrir un nuevo punto de trobada cultural y a fer parti d'as conversacions que marcarán lo suyo desenrrollo futuro. “Queremos acubillar as historias que cudian d'a nuestra tierra, a las luitas d'o territorio y as propuestas artisticas que reinterpretan los nuestros simbolos dende nuevas sensibilidaz, recuperando lo que estiemos pa celebrar lo que somos”, aseguran.
“Una mallata pa (re)mirar Aragón”
Mas que una revista, Alparcera “mira d’estar una mallata y un altavoz: un puesto an trobar-nos, reconoixer-nos y repensarnos, un espacio pa (re)mirar Aragón”, destacan dende l'equipo editorial.
“Trobarez un avance d'o primer numero en a nuestra pachina web. Y, si querez conoixer lo conteniu completo d'a mesma, nos trobarez en Zaragoza, lo proximo martis 10 de marzo a las 19 horas, en as trobadas que organiza l'Asociación Nogará semanalment en a Tabierna Ordio. Tamién, podez trobar en o nuestro instagram los proximos eventos en os cuals seremos presents, pa fer-tos con un eixemplar en papel”, informan con a rasmia d’o que naixe.
Pa rematar, explican que “si quiers fer parti d'o proximo numero de Alparcera, ninvia-nos lo tuyo articlo, fotografía, ilustración, poema u receta relacionau con Aragón y treballamos chuntas”.
