La Chusticia d'Aragón, Concepción Gimeno, ha emitiu una sucherencia en a cuala insta a lo Gubierno d'Aragón y a lo Concello de Fanlo “a adoptar las medidas necesarias pa la conservación de Casa Ruba, una casa-fuerte torreada que lo suyo orichen se remonta a lo siglo XVI”.
Esta sucherencia responde a un expediente que la institución d'o Chusticia d'Aragón encetó d'oficio “debant d'as diversas noticias amaneixidas en os meyos de comunicación que clamaban l'atención sobre lo suyo estau”. Tenendo en cuenta, amás, que ye catalogado como Bien d'Interés Cultural.
La resolución d'a singular institución aragonesa proposa tamién que s'estudeye y valore l'adopción d'una “actuación coordinada per parte d'as administracions con competencia en o territorio”, con a finalidat de que Casa Ruba pueda convertir-se en un instrumento “de desembolique economico, social, cultural y turistico, tenendo en cuenta la suya valor obchectiva y d'a suya connexión con o Parque Nacional d'Ordesa y d'as Tres Serols -en castellano Parque Nacional de Ordesa y Monte Perdido-”.
Las institucions interpeladas, lo Departamento d'Educación, Cultura y Esporte y la Dirección Cheneral de Meyo Natural, Caza y Pesca d'a DChA, y lo Concello de Fanlo “han reconoixiu en as suyas contestacions a la Chusticia d'Aragón la importancia historica de Casa Ruba, d'una excepcional valor, asinas como lo suyo mal estau de conservación y la necesidat d'actuar lo dinantes posible”.
Asinasmesmo, la Chusticia d'Aragón pide en a suya resolución que esta sía ninviada amás, “a lo delegau d'o Gubierno en Aragón, a lo president d'a Deputación de Uesca y a lo president d'a Comarca de Sobrarbe”.
