La presión politica y social pa desbloquiar la Lei de Nacionalidat Saharaui ha tornau a prener fuerza en o Congreso d'os Diputaus y Diputadas. La portavoz d'o Grupo Plurinacional Sumar, Verónica Martínez Barbero, reclamó o pasau mierques a lo PSOE “que permita abanzar una iniciativa lechislativa que permanece estancada a pesar de contar con amplos refirmes parlamentarios”. Mientres la suya intervención, la diputada estió contundent en dirichirse a los socialistas: “Cal desbloquiar d'una vegada la Lei de Nacionalidat Saharaui. No podemos continar mas tiempo con ixe bloqueo por no incomodar a Marruecos”.
La propuesta lechislativa busca facilitar l'acceso a la nacionalidat espanyola y europea d'as personas saharauis naixidas baixo administración espanyola y, en determinaus supuestos, d'os suyos descendients directos. As suyas defensoras sostienen que la mesura permitiría reparar una situación historica derivada d'a responsabilidat colonial espanyola sobre lo Sahara Occidental y ofrecer una solución a milers de personas que continan afrontando situacions d'apatridia y inseguridat churidica.
La reivindicación de Sumar se produce en un inte en o qual la tramitación d'a norma torna a estar en o centro d'o debate politico. Diversas informacions apuntan que la iniciativa estió reactivada iste anyo dimpués de permanecer mas d'un anyo paralizada en o Congreso, encara que as negociacions entre os grupos continan sin zarrar un acuerdo definitivo.
Recullida de sinyaduras pa exichir lo desbloqueo
Paralelament, organizacions solidarias con o pueblo saharaui y representants politicos han impulsau una campanya estatal de recullida de sinyaduras pa exichir que la lei pueda estar debatida y votada cuanto antes. La iniciativa reclama lo desbloqueo inmediato d'a norma en a Comisión de chusticia y pide que lo Congreso permita culminar la suya tramitación parlamentaria.
As promotoras d'a campamya recuerdan que, si la lei sale entabant, milers de personas saharauis con vinclos historicos directos con l'Estau espanyol podrían acceder a la nacionalidat espanyola en condicions semellants a las reconoixidas pa ciudadanos d'atros territorios con especials lazos historicos con l'Estau espanyol. Asinas mesmo, destacan que la mesura tendría un impacto positivo sobre numerosas familias d'acullida que mantienen dende fa decenios relacions estreitas con a población saharaui a traviés de programas de solidaridat y cooperación.
Entre as reivindicacions recullidas en a campanya figuran lo desbloqueo inmediato d'a proposición de lei, la celebración d'una votación parlamentaria en o menor plazo posible y lo reconoiximiento d'os vinclos historicos existents entre l'Estau espanyol, lo pueblo saharaui y la RASD.
Una demanda refirmada por amplos sectors
La exichencia d'abanzar en a lei no procede nomás de Sumar. En os zaguers meses, diferents colectivos saharauis, entidatz solidarias y representants politicos han denunciau que la iniciativa cuenta con refirmes suficients pa prosperar en a Camara pero contina sufrindo longada en a suya tramitación.
La diputada saharaui en o Congreso Tesh Sidi ha estau una d'as voces mas activas en defensa d'a propuesta, insistindo en a necesidat de reconoixer os dreitos d'aquells que naixioron quan lo Sahara Occidental se trobaba baixo administración espanyola. La iniciativa pretende reducir as barreras pa acceder a la nacionalidat y responder a una situación que afecta a milers de personas residentes en l'Estau espanyol.
Seguntes distintas organizacions y especialistas, la población saharaui constitúe un d'os principals colectivos afectaus por situacions d'apatridia en l'Estau espanyol. Numerosas personas arrastran dificultatz administrativas y legals derivadas d'a ausencia d'un reconoiximiento nacional efectivo dimpués d'a retirada espanyola d'o territorio en 1976.
Lo debate de fondo: dreitos y responsabilidat historica
Os defensors d'a lei sostienen que l'aprebación d'a norma supondría un reconoiximiento d'os vinclos historicos, culturals y churidicos existents entre l'Estau espanyol y lo pueblo saharaui. Tamién consideran que contribuiría a reparar una situación heredada d'o proceso de descolonización inconcluso d'o Sahara Occidental y facilitaría l'acceso a dreitos basicos pa milers de personas.
Mientres tanto, la campanya de sinyaduras contina sumando refirmes con l'obchectivo d'aumentar la presión sobre os grupos parlamentarios y conseguir que la Lei de Nacionalidat Saharaui abandone definitivament lo bloqueo que, seguntes denuncian as suyas impulsoras, mantiene paralizada una demanda historica de chusticia y reconoiximiento pa lo pueblo saharaui.
